Предыдущая публикация
Язмышларны кемнәр яза?
-диләр,
Каләмнәре биргән кулыңа..
Ә тормыш ул синең дәфтәр бите
Башламаган, мөхер куелган.
Язмышларны яза безнең сүзләр.
Әйткәннәре, әйтми калганы.
Уйланулар яза, кулланулар.
Яза -сыза, башны ватканы.
Язмышларны яза безнең адым,
Белми-белеп, кайда барганы,
Язмышларны үкенечләр яза,
Атламыйча күбрәк калганы.
Язмышларны елмаюлар яза,
Күңелебез чәчкә төргәндә,
Фаҗигалар яза, нәфесең дәшеп,
Гел нәхакка барып кергәндә.
Язмышларны сайланулар яза,
Гел сайлап та алмый киткәне,
Сагыш булып калган күңелеңдә,
Буш өметең, гомер сүткәне.
Язмышларны тапканнарың яза,
Югалтканың яза, киткәне,
Бәхет итеп кочканнарың яза,
Гомереңә үзен керткәне.
Язмышларны вакыйгалар яза,
Уйлап, уйламыйча атлаган..
Азак инде хатирәләр яза,
Кирәкмәс күк..ләкин саклаган.
Язмыш юлың..тормыш адымнары,
Кемнәр таеп үтәр таймаган.
Язмыш тарих, Язмыш киләчәгең,
Ә юлларын ...үзебез сайлаган.
Рәмзис Исмагилов.
Следующая публикация
Нет комментариев