ЗИ КЪУМРАЛ АЯЛВАЛ

Зун, мус зи хайи хуьруьз хтайтIани, ам гьина чуьнуьх хьана аматIа лугьуз, аялдин шехьна алатай ван хьтин, зи аялвилихъ къекъвезва. Садра заз зи къумрал аялвал, чи кIвалин вилик квай хулан къерехда кьарадин «къалпагъар» къугъвадай чепедин бендинал аламайди хьиз хьана, зун анал фена. Зи аялвал хулан къерехда авай аялри къакъудна, ацукьнавай. За фикирна, белки ам зирингдиз чуьхуьнагар авур хайи вацIун къерехда вили шиминавай. Зун вацIал фена.
Заз, вацI акурла, хвеши хьана… Ам гьа виликдай хьиз зарбдиз авахьзавай. Кьер, лагьайтIа, ада чуьхвена вили авунвай. Инлай – анлай гьа виликдай хьиз, цихъ галаз женг чIугуна, алай-алай чкайрал аламай еке рагъул киреждин къванер аквазвай. Са бязи кул-кусни абурухъагалтна, лал тир. НуькIверини гьа виликдай хьиз лув гузвай. Са гафуналди, зи вилерик аялвал хтана акъвазна. Амма завай адан лепедик кьванни экечIиз хьанач. Низ чида, гьи селди ам гьи яргъариз тухванатIа?
Хуьре мехъер ава. Зунни хтанва мехъерик. Мехъер!.. Зун, зи аялвал еке шуьредиз кIас ягъиз межлисдиз тамашдай чIередал алатIа, лагьана, пек-партал дегишна, мехъерик фена, къавал хкаж хьана. ЧIере гьа виликдай хьиз сагъ я. Анал анжах зи дуст рушарин аялар ацукьнава. Вири крарал мягьтел жедай зи аялвал заз инлайни жагъанач. Низ чида, гьи зуьрнедин зилди ам гьи дагълариз акъуднатIа?
Са сеферда за фикирна: белки зи аялвал за бадедиз хьрак цIамар тухвай куьчеда аматIа, зун хайи куьчедиз экъечIнатIа? Инай гьа зун хьиз кIвачел чIехи тай-туьш тушир калушар алаз, гъиле цIакуларни цуру нек авай къаб аваз, гъвечIи аялар физвай. Заз зи гелер жагъун хъувунач…
«Пешапай» хьана бустандай хтайла, зун айвандик квай кавалдик къаткидай. Заз акI жедай хьи, зи аялвал, ахвариз фена, и кавалдик кума. Амма зи аялвал заз и кавалдикайни жагъаначир.
Ингье зун шегьердиз хтанва, чи кIвалер галай патахъ еримишзавай зун цавуз килигна. Зи вил ана хважамжамда акьуна. Заз гьа хважамжамда зи аялвал чуьнуьх хьанвай хьиз хьана…
Зи виликай къумрал зи бицIи балаяр пайда хьана!...
Бикеханум Алибегова.