Сен бир оз кечикиб келдинг дунёга,
Ёки мен эртароқ келдим адашиб.
Энди кўзларингни қай сайёрадан,
Ёки қай юлдуздан олай талашиб.
Неча аёзларда бўлмади боринг,
Неча баҳорларни сенингсиз кутдим.
Энди сен кимнингдир суюкли ёри,
Мен эса кимгадир алданиб кетдим!
Сен бироз кечикиб келдинг, начора,
Тақдир беравермас кутганларимни.
Англата олсайдим энди бир бора,
Мен сени соғиниб кутганларимни!
Балки мен дунёга келдим ошиқиб,
Сени кеч тилади Худодан онанг.
Энди жон-жонини гулҳанда ёқиб,
Ночор бир кўнгилнинг аҳволлари танг!
Мен сенинг, сен менинг бахтимни тилан,
Яшашда маъни йўқ умидни узиб.
Ҳеч қачон тўқнашмас нигоҳлар билан,
Битта сайёрада юрибмиз кезиб.
Сен бир оз кечикиб келдинг дунёга...
Присоединяйтесь к ОК, чтобы подписаться на группу и комментировать публикации.
Нет комментариев