✅Сарапулын ортчиз «Историческая память» фестиваль

Со улсын мынӥзы пӧртэм ужрадъёс. Ваньмыз соос сӥземын вал кунмылэн но шаермылэн толло, туннэ, ӵуказе нуналэзлы, Атыкай музъемез яратонлы. Фестивалез нуиз Кун Думаысь депутат, Россиысь военно-исторической обществолэн Удмурт ёзэныз кивалтӥсь Лариса Буранова.
Фестиваль усьтӥськиз Кам шур дурын. Татын ик ужзэ мытӥз «Женщины на войне. 1941-1945» адӟытон.
Отысь туспуктэмъёсты учкыса, Л. Буранова вераз:
— Пальышась тусъёссэс адӟыса, уд малпа, та нылкышноос Быдӟым оже пыриськемын шуыса. Соос — разведчицаос, партизанъёс, связистъёс, эмъясьёс. Кышкатэк лобаллязы самолётэн, тушмонэз лёгаса, ширтылӥзы танкен, тыбыр вылазы потталлязы сӧсырмемъёсты, котыртэмысь мозмытылӥзы нылпиосты…
Мукетаз адӟытонын, «История – это МЫ», Донбасслы сӥзем туспуктэмъёсыныз паймытӥз Башкортостанысь фотограф Алия Султан. Шуныт концерт возьматӥзы ожысь ветеранъёс, творчествоя коллективъёс.
Шыпыт ӧй вал Сарапулысь театръёсын но. Артистъёс шудӥзы «Марьино поле», «Пульс Донбасса» постановкаосын. Возьматэмын вал документъёс вылэ пыкиськыса лэсьтэм «Кино на службе Отечеству». Мылкыд карисьёс быгатӥзы городлэн тунсыко интыосаз вуылыны, спецоперациысь воргоронъёслы Кам шур дурын гожтэтъёс, маскировочной сетьёс дасяны.
Фестивале вуылӥзы блогеръёс, иворчиос но. «Информационный фронт» семинарын историкъёсын ӵош соос кенешизы, кызьы туала югдурын улон-вылонэз возьматоно, кызьы историез сурась-пожасьёсын валаса ужано. Тодматскизы «Сьӧд книгаен». Отын пыр-поч гожъямын изьверъёслэн, Украинаысь нацистъёслэн, кырсь ужъёссы сярысь.
Озьы ик Сарапулэ вуылӥзы Москваысь куноос — РИА-Новости агентстволэн историлы сӥзем РИА-lab приложенияз ужасьёс. Соос егитъёсты тодматӥзы 3 проектэнызы — котькудзэ школаосын, нылпи лагерьёсын уже кутыны луэ.
#ларисабуранова #РВИО #историческаяпамять
Туспуктэмъёс: Лариса Бурановалэн "ВКонтакте" бамысьтыз.