🌺3-тӥ-10-тӥ инвожое Удмуртиын ортчоз этнографияя экспедиция

Асьмелэн шаермы пыриз Россиысь калыкъёслэсь лулчеберетсэс, сям-йылолъёссэс утёнлы сӥзем фольклор экспедицияя проектэ.
15-тӥ оштолэзьысен 30-тӥ коньывуонозь Россиысь тодосчиос 11 улосъёсы экспедициосы поталозы.
Кылсярысь, вуылозы Бурятие, Карачаево-Черкессие, Кемерово, Липецк, Курган, Киров, Оренбург улосъёсы, Ханты-Мансийске, нош инвожо толэзе ужалозы асьме дорын.
Шаерысьтымы Калык творчествоя юртысь социально-творческой отделлэн редакторез Людмила Волкова верамъя, та экспедиция ортче «Культура» нацпроект чотын. Удмуртие вуозы Россиысь В. Поленов нимо Калык творчествоя кун юртысь специалистъёс. Тодосчиослэн группаенызы кивалтэ Москваысь история наукаосъя доктор, профессор Александр Черных. Соослы татын юрттозы шаерысьтымы Калык творчествоя юртысь специалистъёс но этнографъёс, искусствоведъёс, историкъёс, кылсярысь, тодосчиос Татьяна Владыкина, Вера Болдырева, Елена Попова но мукетъёс.
Вашкала сям-йылолъёсы эскерисьёс вуылозы Сарапул ёросысь Юрино гуртэ. Татын соос учкозы, кызьы ортче Тройчалы сӥзем праздник. Бадӟым команда мыноз Красногорск палъёсы. Отысь кибашлыос тодматозы чаглэсь (векчи лусъем пуллэсь) лэсьтэм киужъёсынызы но сое пунон амалъёсты. Тодосчиос ужалозы Кез ёросысь Кулига но Степанёнка гуртъёсын но. Татын соос старообрядецъёслэсь дӥськутъёссэс эскерозы. Вуылозы на Каракулино районысь Арзамасцево гуртэ.
Экспедиция йылпумъяськоз Юкаменск ёросын. Россиысь этнографъёслы тунсыко бесерманъёслэн улэм-вылэмзы но лулчеберетсы.
#калык #нацпроект #этнография
Туспуктэм: Бесерман культурая центрлэн "ВКонтакте" бамысьтыз.