Святлана Ціханоўская пра асабістыя змены, жаночае лідарства і гонар быць беларускай

Падчас візіту ў Варшаву Святлана Ціханоўская наведала жывы эфір Раніцы з Белсатам. На якія пытанні адказала беларуская лідарка:
Што стала мацней у Святлане Ціханоўскай за гэтыя пяць гадоў?
«Я думаю, што працаздольнасць. Раней мне не хапала вось гэтай працаздольнасці, калі ў цябе ёсць мэта і ты павінна выконваць нейкую працу — ты яе выконваеш нягледзячы на свае жаданні і ідзеш упарта да выканання сваёй мэты».
Чаму менавіта за апошнія пяць гадоў беларускія жанчыны настолькі моцна сябе праявілі?
«Я ўпэўненая, што беларускія жанчыны заўсёды былі моцнымі, але яны былі так знявераныя ў сабе, бо мужчыны сваім эга часам прыглушалі нейкія амбіцыі і ўпэўненасць жанчын у сабе. Але ж адбылася жаночая рэвалюцыя і жанчыны нашыя паказалі, што мы можам, што мы ўмеем, і насамрэч, часам мы нават больш эфектыўныя, чым мужчыны».
Што для вас асабіста значыць быць беларускай?
«Ведаеце, гэта зноў жа пра трансфармацыю, бо да 2020 году я б нават не ведала, як адказаць на гэтае пытанне: пэўна, жыць на незалежнай тэрыторыі з пашпартам, у якім напісана, што ты беларуска. Але пасля 20-га году прайшла такая трансфармацыя, што цяпер быць беларускай — гэта гонар. Гэта гонар быць часткай нацыі, якая сябе так годна праявіла, якая на працягу гэтых гадоў трымаецца разам, якая не дазволіла рэжыму перагарнуць старонку і нават у цяжкія часы стараюцца дапамагаць адно аднаму. І вось гэты гонар жыве ўва мне вельмі моцна».