Канферэнцыя «Новая Беларусь 2025» завяршылася!

Пра што казала Ціханоўская ў заключным слове?
Сёння ў Варшаве завяршыўся другі дзень канферэнцыі «Новая Беларусь». Цягам уік-энду адбывалася шмат: і дэбаты, і дыскусіі, і праца ў рабочых групах, і прэзентацыя абноўленай структуры дэмакратычных сілаў. Удзельнікі і ўдзельніцы абменьваліся думкамі, бачаннямі будучыні і нават вострымі каментарыямі — маятнік эмоцыяў хістаўся ад сур’ёзных палітычных дыскусіяў да нечаканых жартаў і шчырых эмоцыяў на сцэне.
Па традыцыі, Святлана Ціханоўская напрыканцы івэнту ўручыла ўзнагароды тым, хто зрабіў значны ўнёсак у беларускую справу, абвясціла новыя прызначэнні ў Аб’яднаным Пераходным Кабінеце і падвяла палітычныя вынікі.
У заключным слове Ціханоўская адзначыла:
«Гэтым разам на канферэнцыі атмасфера, як у сапраўдным дэмакратычным парламенце. Гарачыя дэбаты і нават дэмаршы. Напрыклад, Роза Турарбекава вучыла Змітра Шчыгельскага дыялогу. А Уладзімір Жыгар ледзь не купіў Івану Краўцову квіток у Мінск.
Тое, што мы спрачаемся — паказвае: нам не ўсё адно. І тое, што ў нас розныя ідэі, розныя пазіцыі — гэта таксама добра. Хай будуць спрэчкі, а не так, як у рэжыму — калі ўсе паслухмяна ківаюць галавой. Нашая сіла — у нашай разнастайнасці.
Але давайце не толькі спрачацца. Давайце таксама адзначаць і хваліць адно аднаго. Заўважаць пазітыўнае. І глядзець у будучыню з аптымізмам.
Калі мы выстаялі пяць гадоў — то выстаім і да перамогі. Яшчэ раз дзякую ўсім вам за ўдзел. Мы разам. Мы працягваем наш шлях. Шлях да новай Беларусі».