Товук гоштидан киевча котлет.

МАСАЛЛИҚЛАР
1 ДОНА БУТУН ТОВУҚ ТЎШИ, 70 Г САРИЁҒ,
40 Г УН,
70 Г ҚОТГАН НОН
, 1 ДОНА ТУХУМ,
50 МЛ СУТ,
ТУЗ, МУРЧ,
ҚОВУРИШ УЧУН ЎСИМЛИК МОЙИ, КЎКАТ, ГАРНИР.
ТАЙЁРЛАНИШИ:
Киевча котлетлар тайёрлашнинг усуллари кўп. Кимдир гўштни суяги билан тайёрлайди, кимдир суяксиз, кимдир қиймадан, кимдир яхлит гўштдан. Ҳар қандай ҳолатда ҳам бу ўзига хос котлет ўзгачалигини йўқотмайди ва шуниси борки, ҳар қандан усулда бўлса ҳам уни уйда бемалол тайёрлаш мумкин. Демак, бошладик.
Товуқдан тўшини кесиб ажратиб олинг. Бизда товуқнинг териси керак эмас. Аммо тўш яхлит чиқсин. Истасангиз суякни қолдиринг, истасангиз олиб ташланг. Суяксиз ишингиз осонроқ кечади. Кейин кесиб олинган тўшни ётиқчасига бир томондан кесиб, юпқароқ иккита бўлакка аратасиз. Кесаётганда эҳтиёт бўлинг, бирор жойи тешилиб қолмасин. Сабаби, тешикдан ичидаги сариёғи оқиб кетиши мумкин.
Кесилган гўшт бўлагининг устига селофан тўшаб, болғача (ёғоч бўлса янаям яхши) билан уриб-юмшатиб оласиз. Тешиб юбормасликка ҳаркат қилинг.
Кейин кўкатли сариёғ тайёрлайсиз. Бунинг учун шивитни майда тўғранг. Ва юмшоқроқ сариёғ билан аралаштиринг. Албаттаки, туз, мурч ҳам қўшасиз. Бир тусли қоришма ҳолига келгач, сариёғдан унча катта бўлмаган конуслар думалоқланг. Сўнг ҳар бирини унга белаб, совутгичга жойлаб қўйинг. Музхонасига бўлса янаям яхши, тезроқ қотади. Сабаби, котлет думалоқлаётганда сариёғ қаттиқ бўлиши керак, йўқса, эриб-оқиб, ишни қийинлаштиради.
Энди юмшатилган, устига туз-мурч сепилган гўшт бўлагининг устига битта сариёғ конусидан қўйиб, тарангроқ қилиб ўранг.
Кейин бу ўрамнинг яна битта гўшт пластинкасига сиқиб ўрайсиз. Ана энди котлетимиз тайёр. Уни ликобчадаги унга белаб олинг. Сўнг селофанга ўраб, 10-15 дақиқага совутгичнинг музхонасига жойлаб қўясиз.
Энди панировка тайёрланг. Бунинг учун тухумни сут билан бирга аталаб-кўпиртириб оласиз. Туз-мурч қўшасиз. Кейин нонни олиб йирикроқ талқон қилинг. Истасангиз, тайёр талқон ишлатишингиз ҳам мумкин.
Товага мўлгина ўсимлик мойи солиб қиздиришга қўйинг. Мой керакли ҳароратга кўтарилгунича, совутгичдан котлетни олиб, аввал тухумли панировкага ботирасиз, кейин талқонга белайсиз.
Бу ишни икки марта такрорлайсиз. Сўнг қизиб турган мойга котлетни ташлаб, усти қизаргунича қовурасиз. Ана шундан кейин мойдан кўтарасиз-да, 200 даража ҳароратга қиздирилган печга солиб, 10-12 дақиқа давомида печда пиширасиз. Тайёр котлетни иссиқлигида қовурилган картошка ва кўкат билан дастурхонга тортинг.
ДИҚҚАТ ҚИЛИНАДИГАН МАСЛАҲАТЛАР:
- котлет учун ишлатиладиган кўкатли сариёғни бошқа таомларга ҳам ишлатса бўлади. Масалан, димлаб пиширилган гўшт ёки балиқ учун. Кўкатли сариёққа таъбга кўра жиндек саримсоқ қўшсангиз ҳам бўлади.
- котлетни ўраганда ҳеч қаери очилиб қолмаганига эътибор қаратинг. Йўқса, пишираётганда ичидаги сариёғ эриб, оқиб кетади. Шундай бўлмаслиги учун ҳам усти икки марта панировка билан белаб олинади.
- котлетни қовураётганда у мойга тўлиқ ботиб туриши кераклигини эсдан чиқарманг. Агар қозонда эмас, товада қовуришга тўғри келса, қовураётганда товадаги қайноқ мойдан қошиқда олиб, котлетнинг устидан қуйиб турсангиз ҳам бўлади. Шунда паст томони мойда, усти эса қошиқдан тушаётган мойда қизаради.
- қозон ёки фритюрда эмас, балки товада қовурганда (котлет мойда ботмайди) ағдариб-ағдариб устини қизартириб олиш, кейин газ печидан кўпроқ муддат пишириш ҳам мумкин.
- котлет қовурилган мойда котлетни кўтариб олгандан кейин картошка ёки бошқа сабзавотларни қовуриб олишингиз мумкин. Улар котлетга гарнир вазифасини ўтайди.