Башҡортостандың атҡаҙанған артисы, йырсы Гөлназ Асаева социаль селтәрҙә ҡурҡыныс видеояҙма менән уртаҡлашҡан: урманда концерт төркөмө менән ял иткән мәлдә, уларға айыу һөжүм иткән.

Йырсы видеояҙмала үҙенең төркөмө менән тәбиғәткә ял итергә сығыуы хаҡында һөйләй. Артистар бөтә кәрәк-яраҡты йыйып, яҡындағы урманға сыға. Утта йәшелсә, ит ҡыҙҙыралар, гитарала уйнап күңел асалар.
Айыуҙы ризыҡ еҫе һәм кешеләр тауышы ярһытҡандыр. Видеояҙмала кешеләрҙең ҡысҡырған тауыштарын, илауын ишетергә мөмкин. Йырсының концерт директорын айыу йәрәхәтләгән. Гөлназ Асаева уның фотоһүрәтен һалған. Социаль селтәрҙәрҙә артистан бер хәбәр ҙә юҡ. Командаһы менән ҡайҙа ял итеүе лә билдәһеҙ.