🖊 Андрэй Дарожкін - малады паэт, празаік, драматург.

Андрэй Сяргеевіч Дарожкін нарадзіўся 2 ліпеня 1991 года ў вёсцы Гарбавічы Чавускага раёна Магілёўскай вобласці. Да 10 класа ўключна вучыўся ў Гарбавіцкай сярэдняй школе. З залатым медалём скончыў Магілёўскі дзяржаўны абласны ліцэй № 1. Вышэйшую адукацыю атрымаў на факультэце культуралогіі і сацыяльнакультурнай дзейнасці Беларускага дзяржаўнага ўніверсітэта культуры і мастацтваў (г. Мінск). Працягнуў навучанне ў магістратуры названага ўніверсітэта па спецыяльнасці «Мастацтвазнаўства», а пазней — у аспірантуры па спецыяльнасці «Тэорыя і гісторыя культуры» на кафедры гісторыка-культурнай спадчыны Беларусі Рэспубліканскага інстытута вышэйшай школы (г. Мінск). Уладальнік гранта Міністэрства адукацыі Рэспублікі Беларусь (2017). З’яўляецца аўтарам больш за 25 навуковых прац па культуралогіі, апублікаваных у часопісах «Роднае слова», «Искусство и культура», «Вести Института современных знаний» і іншых рэцэнзуемых выданнях, а таксама пастаянным удзельнікам штогадовай Міжнароднай навукова-практычнай канферэнцыі «Традыцыі і сучасны стан культуры і мастацтваў» (на базе Цэнтра даследаванняў беларускай культуры, мовы і літаратуры Нацыянальнай акадэміі навук Беларусі). Піша вершы, прозу, п’есы і сцэнарыі. Працуе бібліятэкарам. Публікаваўся ў часопісах «Маладосць», «Полымя», рэспубліканскім выданні «Настаўніцкая газета», а таксама ў рэгіянальных газетах «Іскра» і «Зара над Друццю». Лаўрэат ІІІ ступені XII Адкрытага літаратурнага конкурсу клуба «Катарсіс» у намінацыі «Проза», лаўрэат ІІ ступені Рэспубліканскага літаратурнага конкурсу «З табой маё слова, Радзіма!» (паэзія), дыпламант Рэспубліканскага паэтычнага конкурсу «Радком вярнуся па вясне…» імя Міколы Мятліцкага, пераможца абласнога (I месца) і рэспубліканскага этапаў (II месца) Конкурсу работ творчай моладзі «Золотое перо “Белой Руси” — 2023» у намінацыі «Аматар», лаўрэат III ступені Рэспубліканскага літаратурнага конкурсу «Книга мне — книга во мне» (намінацыя «Драматургія»), дыпламант II ступені Міжнароднага літаратурнага конкурсу «Это нужно — не мёртвым! Это надо — живым!» (намінацыя «Мастацкая проза»). Піша на рускай і беларускай мовах.
Жыве ў Гродне.
📚✅У 2025 годзе Андрэй Дарожкін выпусціў сваю першую кнігу "Куфар патрэбных казак».