Молитва Божией Матери пред иконой Ее Свенской - Печерской О, Пресвятая и Пренепорочная Дево Богородице, наша Печерская похвало и украшение, державный покрове святаго места сего, истинная Владычице избраннаго удела Своего. Приими нас, недостойных рабов Твоих, убогое моление, с верою и любовию приносящих пред чудным образом Твоим, да посетиши милостивно греховное житие наше, просвещающи его светом покаяния, осени нас, обремененных скорбьми многими, Твоею Небесною радостию, сподоби нас присно славити Тя в мире и благочестии на месте святем сем, да, без порока прешедше путь жития нашего, помощию Твоею достигнем вечнаго веселия во светлости святых и Богоносных отец наших Антония и Феодосия и всех преподобных Печерских и едиными усты и сердцы воспоим Тя с Предвечным Сыном Твоим и Безначальным Его Отцем и Пресвятым, Животворящим, Всеблагим и Единосущным Его Духом во веки веков. Аминь.