Сени жуда соғиндим яна,

Сени яна кўргим келяпти!
Одамларнинг кўнгли тўқ, ана,
Лекин мени ўлгим келяпти!
Қавжираган, чақмоқлар урган,
Боғларингни ўпиб йиғладим!
Йўлларимда мунғайиб турган,
Доғларингни ўпиб йиғладим!
Боққин мана мени ярмим йўқ,
Қани ахир менинг хушларим?!
Сен юрибсан, ана, кўнглинг тўқ,
Мени кирди-чиқди тушларим?!
Нега сендан қайтишим керак,
Ахир сувлар тиниб қолибди!
Ўлмасимдан айтишим керак,
Кўнглим мунча синиб қолибди!
Наҳот битмас бўлди орамиз,
Юрагимни тутти тутунлар!
Қара, қандай қонар ярамиз,
Қара, қандай гўзал... бутунлар!
Сени яна жуда соғиндим,
Сени яна кўргим келяпти!
Қайтиб бергин, дея сиғиндим,
Наҳот яна ўлгим келяпти?!