Молитвословия
Тропарь, глас 8
Тве́рдый адама́нт вои́стинну, о́тче, показа́лся еси́,/ во все́м подо́бяся Влады́це своему́ и Го́споду,/ непра́ведная изгна́ния, ра́дуяся, претерпе́л еси́,/ те́мже и Христо́с святи́телем и му́чеником слико́вна тя́ сотвори́/ и дарова́ тя́ ста́ду твоему́, я́ко сокро́вище неотъе́млемо,/ чудесы́ все́х обогаща́ющее,/ я́ко да и мы́, соше́дшеся к ра́це моще́й твои́х,/ любо́вию вопие́м ти́:/ о вели́кий во святи́телех и ди́вный во страда́льцех/ пречестны́й архиере́ю, Серапио́не о́тче на́ш,/ моли́ о на́с всебла́гаго Бо́га,// да спасе́т ду́ши на́ша.
Кондак, глас 3
Я́ко венце́м, пресве́тлым украси́ся дне́сь вели́кий Но́вград,/ и лику́ет в па́мять па́стыря своего́ и учи́теля,/ я́ко диади́му ца́рскую возло́жши,/ вели́кая же о́на ла́вра све́тло ра́дуется,/ иде́же просла́ви Бо́г Своего́ уго́дника,/ и прояви́ после́днему ро́ду на́шему/ цельбоно́сныя мо́щи твоя́, святи́телю Серапио́не,/ и Це́ркви Бо́жия весели́тися созыва́ющи на славосло́вие,/ велегла́сно вопию́щи:/ ра́дуйся, гра́ду твоему́ и оби́тели похвала́// и всея́ Ру́сския земли́ пресве́тлый свети́льниче!
Молитва
О вели́кий святи́телю Бо́жий о́тче Серапио́не! Вонми́ мое́й сла́бой моли́тве, и предста́ни за мя́, гре́шнаго и убо́гаго, пред Го́сподем, и испроси́ твои́ми усе́рдными моли́твами мно́жеству грехо́в мои́х проще́ние, да, получи́в по́мощь твою́, поживу́ во исправле́ние жития́ моего́. Ты́, я́ко испо́лненный живо́ю струе́ю от Приснотеку́щаго Исто́чника воды́ живота́ ве́чнаго - Христа́ Иису́са, ороси́ се́рдце мое́ и возбуди́ жела́ние любви́ мое́й ко Го́споду, да пу́ть маловре́меннаго жития́ поживу́ в поуче́нии за́поведей Его́ и в покая́нии серде́чнем. И, охраня́емь твои́ми те́плыми за мя́ моли́твами, улучу́ от благосе́рдаго Спа́са Го́спода на́шего Иису́са Христа́ благовре́менную в ну́ждах по́мощь и непосты́дный христиа́нский коне́ц живота́ моего́, прославля́я Его́ со все́ми, от ве́ка благоугоди́вшими Ему́, во ве́ки веко́в. Ами́нь.
Нет комментариев