Интернетда Mercedes-Benz GL йўлтанламас автомобилининг кейинги авлоди Mercedes-Benz GLS модели фотосуратлари пайдо бўлди. АҚШда олинган бу суратлар Car нашри томонидан чоп этилди. Суратлардан янги модель ҳозирги вариантидан фарқ қилишини кўриш мумкин. Мисол учун, радиатор панжараси янги кўриниш олган, янги чироқлар ва бамперлар ўрнатилган. Ушбу суратларни олган фотосуратчиларнинг айтишича, моделнинг интерьери яхшиланган, унда янги Comand мультимедиа тизими қўлланган. Бундан ташқари, фотожосуслар GLS нинг иккита версияси – оддий ва Mercedes-Benz компаниясининг тюнинг-ательеси AMG томонидан қўшимча ишланган версиясини суратга олишга муваффақ бўлишган. Бу икки версия бамперларнинг безалиши, ғилдирак аркаларидан чиқиб турадиган безак деталининг мавжудлиги ва ўзгача ғилдирак дисклари билан фарқланади. GLS моторлари ҳақида ҳеч қандай маълумот берилмаган. Янги модель кузда Лос-Анжелесдаги автосалонда намойиш қилиниши тахмин қилинмоқда.GL моделини GLS қилиб қайта номлаш ҳақида 2014 йилнинг кузида маълум қилинган. Ўшанда яна учта модель: M-Class модели GLE га, GLK модели GLC га, SLK модели SLC га қайта номланган.