АҚШнинг “Ford Motor” автомобилсозлик корпорацияси эшик қулфидаги носозлик туфайли қарийб 400 мингга яқин автомобилни ортга қайтариб олмоқда. Бу ҳақда компания берган баёнотга иқтибос келтирган ҳолда USA Today нашри хабар берди. 2012-2014 йилларда ишлаб чиқарилган 389 мингдан зиёдроқ Ford Fiesta, Ford Fusion ва Lincoln MKZ автомобиллари қайтариб олинмоқда. Уларнинг барчаси Мексикада ишлаб чиқарилган ҳамда Шимолий Америка бозорига етказиб берилган. Айтиб ўтилган транспорт воситаларининг эшик қулфларида носозликлар аниқланган. Бу носозликлар туфайли автомобиль эшиклари ҳаракат вақтида ўз-ўзидан очилиб кетиши мумкинлиги қайд қилинган. Компания ҳозирча бу муаммо билан боғлиқ ҳеч қандай жиддий ҳодиса содир бўлмаганини таъкидламоқда. АҚШнинг Йўлларда ҳаракат хавфсизлигини бошқариш Миллий бошқармаси сайтида айтилишича, бошқармага Fiesta эшик қулфлари яхши ишламаётгани ҳақида 207та шикоят келиб тушган, улардан 65тасига кўра автомобиль эшиклари ҳаракат вақтида очилиб кетгани ҳолатлари кузатилган. Бошқарма бу ҳолат бўйича 2014 йилнинг сентябрида тафтиш ўтказишни бошлаганди. Носоз Fiesta, Fusion ва Lincoln MKZ автомобиллари эгалари эшик қулфларини бепул алмаштириш учун компаниянинг дилерлик марказига келишлари керак. 2014 йилнинг сентябрида Ford компанияси хавфсизлик ёстиқлари тизими ишидаги носозликлар туфайли 850 мингга яқин автомобилини қайтариб олишини эълон қилганди. Унда гап 2013–2014 йилларда ишлаб чиқарилган Ford C-MAX, Fusion, Escape ва Lincoln MKZ моделлари ҳақида борган эди.