“Mercedes-Benz” Женева автосалонида “S-Class”нинг энг қиммат ва энг узун версияси – “Pullman” лимузинини намойиш этди. Ушбу автомобиль ҳақидаги батафсил маълумотлар февраль ўрталаридаёқ эълон қилинганди. Янги маълумот эса унинг нархи билан боғлиқ. Дастлаб янги машина “570 минг доллар атрофида” бўлади, деб тахмин қилинганди. Энди эса “Мерседес” бу маълумотни расман тасдиқлади: унинг нархи 566 минг доллардан бошланади.

Янги машинанинг ғилдирак базаси илгариги “Пульман”никидан 103 миллиметрга узун ва 4418 миллиметрга тенг. Автомобилнинг узунлиги 6499 ва баландлиги 1598 миллиметр. Лимузинни 12 цилиндрли 530 от кучига эга олти литрли битурбомотор ҳаракатга келтиради.

“Пульман”нинг орқа қисмига тўртта ўриндиқ ўрнатилган (бир-бирига қарама-қарши жойлашган иккитадан ўриндиқ). Иккита ўриндиқ 43,5 даражага орқага ётиши мумкин. Машина “Burmester” мусиқа тизими билан жиҳозланган. “Mercedes-Pullman” сотувга 2016 йилдан чиқади.