Дзень работнікаў сельскай гаспадаркі і перапрацоўчай прамысловасці варты асаблівай увагі па сваёй важнасці і значнасці. Дзякуючы залатым рукам, мудрасці, дасведчанасці сельгасвытворцаў жыве і квітнее наша ўрадлівая зямля. Усё мяняецца, а праца вяскоўцаў па-ранейшаму неабходна.
Слуцкі раён — адзін з буйнейшых раёнаў па вытворчасці сельскагаспадарчай прадукцыі ў Мінскай вобласці. Напярэдадні прафесійнага свята «Слуцкі край» падвёў вынікі с Андрэем Янчэўскім, старшынёй Слуцкага раённага выканаўчага камітэта ( http://s-k.by/ru/people-ru/view/andrej-jancheuski-my-maem-bagaty-xlebny-karavaj-i-upeunenasts-u-zautrashnim-20770/ ).
— Андрэй Уладзіслававіч, з якімі вынікамі аграрыі раёна зявяршаюць сельскагаспадарчы год?
— Магу з упэўненасцю сказаць, што аграрыі прыклалі ўсе намаганні, каб годна сустрэць прафесійнае свята. Слуцкі раён па-ранейшаму ўтрымлівае статус лідара Мінскай вобласці па валавой вытворчасці збожжа — сёлета мы ў чарговы раз пацвердзілі гэта. Наогул, для сельскагаспадарчай галіны 2020 год быў спрыяльным. Разам з кукурузай сабралі больш за 200 тысяч тон зерня, сярэдняя ўраджайнасць — больш за 50 цэнтнераў з гектара. Што тычыцца менавіта збожжа, то валавы сбор — 166 тысяч тон пры сярэдняй ураджайнасці 45 цэнтнераў з гектара. Дзяржзаказ на харчовае збожжа выкананы ў поўным аб’ёме, у дастатковай колькасці закладзена ў сховішчы фуражнага зерня. Вынікі на хлебнай ніве пераканаўча сведчаць аб тым, што слуцкая зямля можа стабільна, у любых умовах даваць значны ўраджай збожжа і іншых культур.
Аддаючы належнае агранамічнай службе сельгасарганізацый, механізатарам, якія працавалі на падрыхтоўцы глебы, сяўбе і доглядзе за пасевамі, варта адзначыць тых, хто працаваў на жніве: 135 камбайнавых экіпажаў і 132 вадзіцелі, разам з вопытнымі аграрыямі старанна працавалі 25 маладзёжных экіпажаў і 9 маладых вадзіцеляў. Дарэчы, сёлета 96 экіпажаў намалацілі больш чым па тысячы тон збожжа, 27 — больш чым па дзве тысячы тон, 2 экіпажы пераадолелі трохтысячны рубеж. Больш за чатыры тысячы тон — рэкорд Слуцкага раёна — у экіпажа філіяла «Падсобная сельская гаспадарка «Наша Ніва» ААТ «Слуцкі мясакамбінат» Івана Валер’евіча Лучыка і Сяргея Іванавіча Гурыновіча.
Старанна працавалі і вадзіцелі на адвозцы збожжа ад камбайнаў: Сяргей Віктаравіч Касцюк (філіял «Падсобная сельская гаспадарка» ААТ «Слуцкі мясакамбінат»), Максім Раманавіч Пракапенка (філіял «Падсобная сельская гаспадарка «Наша Ніва» ААТ «Слуцкі мясакамбінат»).
Добрых слоў заслугоўваюць і іншыя працаўнікі, якія дапрацоўвалі збожжа, перавозілі яго ў склады, дастаўлялі на камбінаты хлебапрадуктаў.
Асаблівай удзячнасці заслугоўваюць кіраўнікі сельгасарганізацый за ўменне згуртаваць і мабілізаваць людзей на дасягненне галоўнай мэты — уборкі хлеба.
Бульба ў раёне ўбрана на плошчы 390 гектараў. Так званага другога хлеба сабралі 14 800 тон пры сярэдняй ураджайнасці 380 цэнтнераў з гектара — добра спрацавалі, асабліва ў саўгасе «Рачкавічы» Беларускай чыгункі. Завяршаюць у раёне ўборку цукровых буракоў - да канца тыдня справімся. Ураджайнасць сёлета — на ўзроўні 600 цэнтнераў з гектара. На жаль, цукрыстасць амаль на адзін працэнт меншая, чым у папярэдні год.
Вынікова папрацавалі работнікі сельгасарганізацый на нарыхтоўцы кармоў. На ўмоўную галаву жывёлы нарыхтавалі 37,4 цэнтнера кармавых адзінак, плюс 8 цэнтнераў кармавых адзінак — таксама добры паказчык, гэта дазволіць нам стабільна працаваць у жывёлагадоўлі.
Адзін з важных фактараў павышэння сельскагаспадарчай вытворчасці - забяспечанасць сучаснай тэхнікай. Так, сёлета машынна-трактарныя паркі сельгасарганізацый папоўнілі трактары, збожжаўборачныя і кормаўборачныя камбайны, касілкі і іншыя прыстасаванні.
— А як папрацавалі сельгасарганізацыі ў жывёлагадоўчай галіне?
— Прыемна адзначыць, што і ў жывёлагадоўлі таксама маем годныя вынікі. Валавы надой малака за дзевяць месяцаў склаў 145 тысяч тон, ці 109,4%, удой на карову — 4 946 кілаграмаў (107,6% да адпаведнага перыяду мінулага года). Малочная галіна для нас асноўная, дае добры прыбытак, яе рэнтабельнасць складае 36,7%, самая высокая ў саўгасе «Рачкавічы» — 93,7%.
Лідары на Случчыне — калектывы: малочнатаварнай фермы в. Рачкавічы ДП «Саўгас «Рачкавічы» (загадчык Аксана Анатольеўна Цодзік), малочнатаварнага комплексу в. Знамя СГФ ААТ «Слуцкі сыраробны камбінат» (загадчык Алена Сяргееўна Мерная).
Высокія вынікі работы ў аператараў машыннага даення Тамары Анатольеўны Каржэвіч (ААТ «Вясейскі Пакроў»), Святланы Канстанцінаўны Горбач (ААТ «Падлессе-2003») і іншых.
Для паляпшэння ўмоў утрымання дойнага статка, павелічэння вытворчасці малака ў сельгасарганізацыях раёна вядзецца работа па мадэрнізацыі і рэканструкцыі малочнатаварных ферм.
Гавядзіны атрымалі сёлета 10 729 тон, 116% да леташняга паказчыка, сярэднясутачныя прывагі склалі 701 грам (114%). Гавядзіна стратная, але ёсць нюансы, што яна лічыцца з затратамі на вырошчванне цёлак для вытворчасці малака. Сёлета павялічылі і выпуск свініны — 5 тысяч тон (110%), сярэднясутачныя прывагі - 671 грам.
Сярод жывёлаводаў вылучаюцца Наталля Мікалаеўна Лявончыкава, Святлана Мікалаеўна Фядзякіна (КСУП «Эксперыментальная база «Танежыцы»), Алена Леанідаўна Галяс (СУП «Племгаз «Слуцк»).
У філіяле «Генетык» ААТ «Смалявічы-бройлер» са студзеня 2020 года распачата вытворча-гаспадарчая дзейнасць (вытворчасць яек). Ужо выйшлі на прыбытковую работу. Сёлета атрымалі 10 030 тысяч яек.
Галоўныя паказчыкі - фінансавы вынік. За студзень — верасень вытворчасць валавой прадукцыі ў сельскагаспадарчай галіне ў супастаўных цэнах склала 110,1%. Ад рэалізацыі прадукцыі атрымалі прыбытак — 15 782 тысячы рублёў, больш чым летась. Рэнтабельнасць вытворчасці склала 10,3%. Сярэднямесячная зарплата ў сельскагаспадарчай галіне склала 943 рублі, павялічылася на 22% у параўнанні з аналагічным перыядам мінулага года. Па выніках адзначанага перыяду стратных сельгасарганізацый у раёне няма.
Годна папрацавалі многія сельгасарганізацыі Случчыны, але па валавой вытворчасці і эканамічных паказчыках вылучаюцца сельскагаспадарчы філіял ААТ «Слуцкі сыраробны камбінат» (начальнік Валерый Канстанцінавіч Міхалькевіч), ААТ «Казловічы-Агра» (дырэктар Сяргей Уладзіміравіч Пенязь), ДП «Саўгас «Рачкавічы» (дырэктар Мікалай Рыгоравіч Красуцкі).
— Важна не толькі вырасціць, але перапрацаваць прадукцыю і яе рэалізаваць…
— Гэта сапраўды так. Практычна ўся сыравіна, якую атрымліваюць у сельскай гаспадарцы раёна, перапрацоўваецца на прадпрыемствах Случчыны. Яна карыстаецца ўстойлівым попытам у краінах блізкага і далёкага замежжа.
Над павелічэннем аб’ёмаў вытворчасці, пашырэннем асартыменту выпускаемай прадукцыі, паляпшэннем яе якасці працуюць у ААТ «Слуцкі сыраробны камбінат», «Слуцкі хлебазавод», «Слуцкі камбінат хлебапрадуктаў». Вынікова працуе ААТ «Слуцкі цукроварафінадны камбінат». Неаднаразова прадпрыемства было прызнана лепшым цукровым камбінатам у ЕАЭС. Прадпрыемствы пашыраюць геаграфію экспарту тавараў.
Забяспечваюць стабільную работу адкрытыя акцыянерныя таварыствы «Слуцкі воцатны завод», «Слуцкі льнозавод», ВВЗ «Колас» адкрытага акцыянернага таварыства «ДОРОРС».
Прадукцыя перапрацоўчых прадпрыемстваў штогод адзначаецца дыпломамі міжнародных конкурсаў-выставак. Напрыклад, на міжнародным форуме «Продэкспо» ў гэтым годзе сваю прадукцыю прадстаўлялі ААТ «Слуцкі мясакамбінат» і ААТ «Слуцкі сыраробны камбінат», якія зноў даказалі высокі ўзровень якасці прадукцыі.
— Не сакрэт, што за ўсімі лічбамі стаіць нястомная праца людзей.
— У аснове высокіх дасягнутых вынікаў у аграпрамысловай галіне раёна ляжыць сапраўды самаадданая праца ўсіх работнікаў і ветэранаў сельскай гаспадаркі. Напярэдадні свята хачу звярнуцца да нашых ветэранаў са словамі шчырай падзякі за ўнесены ўклад у развіццё аграрнай галіны раёна. Гэта вашай працай, дарагія ветэраны, створана аснова, якая дазваляе сёння развіваць вытворчасць, перадаваць маладому пакаленню любоў да нялёгкай сельскай працы. Нізкі вам паклон і вялікі дзякуй!
Асобных слоў падзякі заслугоўваюць працаўнікі ўпраўлення па сельскай гаспадарцы і харчаванні райвыканкама пад кіраўніцтвам Дзмітрыя Сяргеевіча Каралёва. Калектыў дэманструе зладжанасць, дзелавы падыход у рабоце, якія дазволілі дасягнуць станоўчых вынікаў у вытворчасці сельскагаспадарчай прадукцыі.
У тых, хто заняты ў сельгасвытворчасці, практычна не бывае выхадных дзён: спецыфіка гэтай працы патрабуе пастаяннай аддачы сіл і ўвагі, бо працаўнікі палёў і ферм, вырошчваючы хлеб, вырабляючы малако і мяса, ствараюць харчовы дабрабыт краіны. Не меней значны ўклад у гэта і работнікаў галін, якія абслугоўваюць сельскую гаспадарку, дапамагаюць ім — ААТ «Слуцкі Аграсэрвіс», Слуцкая раённая ветэрынарная станцыя, племстанцыя, інспекцыя па насенняводстве, каранціне і ахове раслін.
Нельга абысці ўвагай тых, хто дзякуючы сваёй стараннасці, прафесіяналізму адзначаны ўзнагародамі на дзяржаўным узроўні. Дырэктар ДП «Саўгас «Рачкавічы» Беларускай чыгункі Мікалай Рыгоравіч Красуцкі атрымаў медаль «За працоўныя заслугі», на мінулым тыдні Прэзідэнт Рэспублікі Беларусь Аляксандр Рыгоравіч Лукашэнка ўручыў ордэны Пашаны дырэктару ААТ «Слуцкі хлебазавод» Дзмітрыю Дзям’янавічу Чырцу, аператару машыннага даення ААТ «Вясейскі Пакроў» Наталлі Уладзіміраўне Беразоўскай. Вельмі прыемна, што жывёлавод філіяла «Падсобная сельская гаспадарка» ААТ «Слуцкі мясакамбінат» Галіна Аляксандраўна Касымакунава ўдастоена звання «Заслужаны работнік сельскай гаспадаркі». Нягледзячы на паважаны ўзрост, яна працягвае працаваць і дасягае добрых вынікаў. Нагрудным знакам Міністэрства сельскай гаспадаркі і харчавання Рэспублікі Беларусь «За заслугі ў сельскай гаспадарцы» адзначаны Аляксандр Аляксандравіч Анціпцаў, трактарыст-машыніст саўгаса «Рачкавічы».
На Случчыне — працавітыя людзі. Мы разам пераадольваем нягоды, радуемся поспехам, шмат працуем і ў чарговы раз пераконваемся, што будучыня — у нашых руках. Мы ведаем, які патэнцыял у Случчыны і як яго рэалізаваць. Упэўнены, што разам мы будзем паспяхова вырашаць задачы па павелічэнні вытворчасці сельскагаспадарчай прадукцыі, нарошчваць экспартны патэнцыял.
Паважаныя працаўнікі аграпрамысловага комплексу, дзякуючы вашым намаганням, прафесійнаму майстэрству, вернасці сваёй справе і адказнасці мы маем багаты хлебны каравай і ўпэўненасць у заўтрашнім дні.
Шчыра жадаю моцнага здароўя вам і вашым блізкім, дабрабыту і дастатку вашым сем’ям, радасці, шчасця і новых працоўных поспехаў! Са святам!
Аддзел навін
Фото: Алесь Достанко
Присоединяйтесь к ОК, чтобы подписаться на группу и комментировать публикации.
Нет комментариев