У Кіеве затрымалі грамадзяніна Беларусі паводле падазрэньня ў незаконным набыцьці і захоўваньні з мэтай далейшага продажу 2,44 кіляграма асабліва небясьпечнага псыхатропнага рэчыва PVP.

Згодна з Крымінальным кодэксам Украіны, яму пагражае пазбаўленьне волі на тэрмін ад 9 да 12 гадоў з канфіскацыяй маёмасьці. Падазраваны адмаўляе віну.
Як стала вядома Свабодзе, ідзецца пра беларуса, які ўдзельнічаў у дывэрсійнай апэрацыі Службы бясьпекі Ўкраіны на аэрадроме ў Мачулішчах пад Менскам, у выніку якой быў пашкоджаны расейскі самалёт А-50.
Свабодзе вядомыя яго імя і прозьвішча, але згодна з Цывільным кодэксам Украіны «імя фізычнай асобы, якая затрымана, падазраецца ці абвінавачваецца ва ўчыненьні злачынства, ці асобы, якая ўчыніла адміністрацыйнае правапарушэньне, можа быць выкарыстана (абнародавана) толькі ў выпадку набыцьця законнай сілы абвінаваўчага выраку». Сьледзтва ў яго справе яшчэ працягваецца.
У Беларусі яго завочна асудзілі на 15 гадоў зьняволеньня ў справе аб дывэрсіі ў Мачулішчах.
Як вынікае з дакумэнтаў, якія ў сваім распараджэньні мае Свабода, сам беларус катэгарычна аспрэчвае датычнасьць да інкрымінаванага яму злачынства.