ONA QIZLARIM...
... Ustiga shaffof topik bilan na mini-yubka, na «maksi-poyas» deb bo'lmaydigan narsani ilib olgan… Qizgina, qayoqqa shoshilasan, nimani qidiryapsan? To'xta, hali kech emas, to'xta! Uyingga qayt, o'zligingga qayt. Sen boshqacha hayot uchun, boshqa maqsad uchun yaratilgansan!
Ko'z oldimda turibsiz – nozik, bokira, endi kurtak yozayotgan navniholsiz, navbahorning birinchi nishonalari – endigina 12-13 ga kiribsiz… Hayotga endigina qadam qo'ymoqdasiz. Biroq ba'zi tengdoshlaringiz allaqachon hayotdan ko'z yumganligini bilasizmi? Balog'at yoshiga yetayotgan qizlarda o'z joniga qasd qilish hollari ko'payib borayotgan ekan. Hali javobsiz sevgi, hali xiyonat, hali sevgan kishisining o'limi, hali oiladagi tashvishlar – bularning barchasi yoshgina qizlarni to'qqizinchi qavatdan o'zini tashlashga yoki bir quti dorining hammasini birdaniga ichib yuborishga majbur qilayotgan emish…
Qizlarim, ona qizlarim…
Hozir Sizning murg'ak vujudingizda eng buyuk mo''jiza – ayollik tabiati shakllanmoqda. Biroq, zamonning talabi va modani deb siz uni nobud qilasiz. Siz hozir qahraton qishda ham moda deb kiyib yurgan kiyimlar (agar ularni kiyim deyish mumkin bo'lsa) badaningizni sovuqdan, izg'irin shamollardan himoya qila olmaydi.
Bir necha yillardan keyin esa ginekolog kichik tos suyagi atrofida surunkali shamollash davom etib kelganini, endi davolashga kech bo'lganligini aytib qolishi mumkin, xudo ko'rsatmasin… To'g'ri, shifokor sizni davolashga harakat qilib ko'radi, biroq bugungi tibbiyotning eng zamonaviy texnologiyalariga qaramay, ko'pchiligingiz endi hech qachon ona bo'la olmaysiz…
Qizlarim, ona qizlarim…
Balog'at yoshida qalbingizga ilk sevgi mehmon bo'ladi. Mehmon bo'lsa – marhabo, bu go'zal tuyg'u barchangizga muborak bo'lsin! Haqiqiy sevgi insonni ma'naviy va ruhiy kamolotga yetaklaydi, biroq bu narsa biz aytgan ana shu haqiqiy sevgimikan? Biroq, bu narsa yuzaki ehtiros bo'lib, «zerikarli kunlar»ni qiziqroq o'tkazishga havas bo'lsa-chi?
Agar bu «tuyg'u» sizni aldab, sevgi degan narsamiz patologik shahvatga aylanib ketsa-chi? Bu narsani to'xtatib qolish mumkinmi? Bunday vaziyatlarda ko'pinchi tormozlar ishlamay qoladi. Ko'nglingizga o'rnashib qolgan narsa uchun hamma narsaga rozi bo'lib qolganingizni sezmay qolsangiz-chi?..
Uni qor-yomg'irga qaramay, soatlab pod'ezd oldida kuta olasiz, uning bir og'iz taklifi bilan eng qaltis chegaralarni buzib o'ta olasiz – diskotekaga borasiz, sigaret chekib ko'rasiz, alkogolь, narkotiklarni tatib ko'rasiz, eng dahshatlisi – eng muqaddas narsani - o'zingizni unga bag'ishlaysiz… Keyin esa unga kerak bo'lmay qolasiz.
Qo'ng'iroqlaringizga, SMSlaringizga javob bermaydi, ko'chada ko'rishib qolsangiz qaergadir shoshib turgan bo'ladi, xullas – siz uning joniga tegibsiz, u sizdan bir amallab qutulmoqchi! Sevgi-muhabbatingiz, ehtiroslaringiz foydasiz, asossiz bo'lib chiqadi – axir uni o'zingiz bo'rttirib, bo'yab, ko'z-ko'z qilgan edingiz-da! Aslida hech gap yo'q edi-da!
Ana endi bu og'ir vaziyatdan chiqish yo'llarini qidirib qolasiz.
Tabiatan qiziqqon, o'jar, sirkasi suv ko'tarmaydigan qizlar shartta o'z joniga qasd qiladilar – o'zlarini mashina ostiga tashlaydilar, tomirlarini qirqadilar, tabletka ichadilar… Ba'zilar o'zini joniga qasd qilgan qilib ham ko'rsatadi – jon shirin, ota-onasini va ayniqsa o'sha yigitni qo'rqitib, e'tiborini qaratishga urinadi… «Ishqilib, u qaytib kelsa bo'ldi…». Ba'zi qizlar gazetalarga dardini to'kadi – bevafoning ismidan faqat bosh harf yozilgan bo'ladi. Qolgani – deyarli bir xil.
Afsuski, bunday paytlarda «bevafo»lar ota-onaga qaraganda anchagina xotirjam bo'lishadi, «o'z joniga qasd qilish» hollari qayta-qayta takrorlansa ham, «yigit o'lgur» hech qaytavermaydi. Qiz esa hali psixoterapevtga, hali psixiatrga qatnay boshlaydi. Afsuski, darz ketgan ruhiyat bilan endi haqiqiy, to'laqonli hayotni boshlash juda qiyin kechadi.
Ming afsuski, ba'zan aldangan qizlarning nafratga to'la qalblarida o'ch olish maqsadi alanga oladi. Bu dahshatni qarangki, hayotni davom ettirish uchun yaratilgan bo'lajak onalar «menga bo'lmasa, hech kimga bo'lmasin» qabilida kimningdir hayotiga yakun yasashga qaror qiladi. Oqibatda kimdir hayotdan ko'z yumadi, kimdir esa bir necha yillarni voyaga yetmaganlar koloniyasida o'tkazib keladi… Endi bunday o'tmish bilan yangi hayot boshlashning naqadar qiyinligini aytib o'tirish shart emas.
Biroq, bu vaziyatdan chiqishning yana bir uyatli, sharmandali varianti ham uchrab turadi - bir qo'shiqda aytilganidek, «sochimdan ko'p oshig'im, sen bo'lmasang - boshqasi». Senga kerak bo'lmasam, boshqa bittasiga kerak bo'lib qolarman… Bu «variant»ning javob tezgina topila qoladi ham.
Bu «variant»da yigitlarga sizdan nima kerakligi aniq bo'lib tursa ham parvo qilmaysiz, o'ch olsangiz bo'ldi, muhimi - «yigitingiz» bor. Biroq, eng yomoni shuki, bunisi ham tashlab ketsa, yana boshqasi topiladi, keyin yana boshqasi, keyin yana… «Qo'lma-qo'l» bo'lib ketasiz. Balki o'ynab-kulib yashash, yaxshi yeb, yaxshi kiyish uchun faqat to'shak talab qilinadi, deb o'ylarsiz, biroq bu shirin yolg'on! Achchiq haqiqat borligini tan olmay ilojingiz yo'q.
Narkologik klinikalar yoki teri-tanosil kasalliklari dispanserlari ana shu shirin yolg'onga aldangan yigit-qizlar bilan to'lib-toshib yotibdi. Sizni u yerda davolatish ota-onaning cho'ntagiga ham, sog'ligiga ham qaqshatqich zarba beradi. Bunday statsionarlarning ichiga kirib-chiqib yurishning o'ziyoq ruhiyatingizda og'ir asorat qoldiradi.
Qaniydi hammasi shu bilan tugasa… Betartib jinsiy hayot kechirishning bundan ham og'ir oqibatlarga olib keladi. Sizga o'xshagan qancha-qancha qizlar abort qildirishga keladilar. Voyaga yetmagan qizlar o'rtasida abort qildirganlar soni hech qaysi statistika ma'lumotlarida aniq berilmaydi. Buning iloji yo'q. Ba'zi xususiy klinikalarda esa na ismingizni, na yoshingizni so'rashadi – pul bo'lsa bo'ldi.
Shifokor abort qildirishga kelgan qizlarning taxminan o'ndan biriga rad javobini beradi – abort qildirishga kech bo'lgan yoki bu ona organizmi uchun xavfli bo'ladi. Ona bo'lish har bir ayol uchun baxt bo'lsa-da, yuqoridagi holatda farzand ko'rgan yosh onalarni ham, ulardan tug'ilajak begunoh bolalarni baxtli deya olmaymiz. Kimdir taqdirning bu og'ir sinovidan to'g'ri xulosa chiqarib, to'g'ri yo'lni tanlasa, tavba qilib, gunohini yuvishga intilsa mayliga, biroq buning aksi bo'lib chiqsa-chi?
Ba'zilaringiz shifokor rad qilsa ham, abort qilishni talab qilib turib olasiz, ba'zilaringiz uy sharoitida boshqa «xalq» vositalarni qo'llab ko'rasiz… «Keraksiz» homiladan qutulmoqchi bo'lasiz… Ba'zan buning uddasidan ham chiqasiz. Ammo ko'pincha kechikkan abort onaning o'limiga ham sabab bo'ladi, yana bu ishning jinoiy javobgarligi ham bor. Eng dahshatlisi shuki, homilasi qornidaligida undan qutula olmaganlar uni tug'ilgan zahoti o'zlari o'ldiradilar!!! Bu gunohning naqadar og'irligini aytishga til ham bormaydi.
«Omadi kelmay», abort qildira olmaganlar turli vositalar bilan homilasidan qutulaman deb hali tug'ilmagan murg'ak chaqaloqni mayib-majruh qilib qo'yadilar. Nimjon, nogiron, tani nosog', aqli zaif tug'ilgan, bolalarning ko'pchiligi ana shunday ona deb nomlashga noloyiq kimsalardan tug'iladilar.
Yana ba'zilar bolani tug'ib, ularni yo ota-onasiga (har tugul), yo davlatning qaramog'iga tashlab ketib, «tirik yetim»larning sonini ko'paytiradilar.
Qizlarim, ona qizlarim…
Yuzingiz ilk qordek beg'ubor, toza bo'lsa ham, kosmetikaga bir dunyo pulni sarflab yuborasiz. Kosmetik vositalar zararli bo'ladi, demoqchi emasmiz. Biroq, yuqori sifatli, foydali, haqiqiy kosmetika mahsulotlari juda qimmat bo'ladi. Siz esa ularning eng arzon va sizga eng zararlisini sotib olasiz.
Oydek yuzlaringiz pomadalar, bo'yoqlar, ranglar ta'siri ostida nobud bo'ladi. Urush so'qmog'iga chiqqan hindular ham sizchalik bo'yanmagandir… Eng so'nggi modada turmaklataman deb, turli gellar, musslar, laklar bilan sochingizning asl chiroyini yo'qotgansiz, kimyoviy vositalar bilan ayovsiz ishlov berilgan bu sochlar endi hech qachon asl holiga kelmasa kerak…
Eh, bilsangiz edi, ayollarda teri raki kasalligi qanchalik ko'p uchrashini, bu kasallik asosan erkaklarda emas, ayollarda uchrashini, bu kasallikning asosiy sababi esa haddan tashqari ko'p ishlatilgan sifatsiz kosmetika ekanligini bilsangiz edi…
Qizlarim, ona qizlarim…
Bu yo'lga qanday kirib ketdingiz axir! Boshida hammasi yaxshi ketayotgan edi-ku… Yo'q, siz hammasini bilardingiz, bilib turib, haqiqatga tik qaragingiz kelmadi.
Esingizda bo'lsa, sinfingizda bir qiz bo'lardi – kamtargina, jimgina yurardi, yaxshi o'qirdi, diskotekalarga bormas, yigitlar bilan ortiqcha gaplashmas, ichkilikning yaqiniga yo'lamas, hatto chekishga ham qiziqmas edi. Uning hayoti siz uchun zerikarli tuyular, «Hech narsa mumkin emas ekan-da» deb uning ustidan kulardingiz…
Har doim uzun ko'ylak kiyib, ro'mol o'rab yuradigan bu qiz o'zini qanchalik chetga tortsa, siz shunchalik unga tegajog'lik qilardingiz. Yigitlarning unga hurmat bilan, hatto biroz hayiqib muomala qilishi esa sizning g'ashingizga tegardi. Ha, tan olishga majbursiz, yigitlar ochiq-sochiq yuradigan, tap tortmay gaplashib ketaveradigan qizlarga unchalik e'tibor berishmaydi, chunki ularga yetishish qiyin emas. Ko'zga ko'rinmas ibo pardasiga o'ralgan, erkak kishiga tik qaramaydigan qizlar esa boshqa gap.
O'sha qiz maktabni a'lo baholarga bitirdi, oliy ma'lumot ham oldi, o'ziga munosib ishga ham kirib oldi. Hozir u turmushga chiqib ketgan, tez-tez ota-onasinikiga turmush o'rtog'i bilan, sog'lom bolalarini yetaklab kelib turadi…
Qizlarim, ona qizlarim…
Kompьyuterda siz o'qiyotgan ushbu satrlarni yozar ekanman, derazadan pastga qaradim. Sizga o'xshash qizlardan biri, balog'at yoshiga yetib qolgan qizgina trotuardan shoshib ketib bormoqda. Ustiga shaffof topik bilan na mini-yubka, na «maksi-poyas» deb bo'lmaydigan narsani ilib olgan…
Qizgina, qayoqqa shoshilasan, nimani qidiryapsan? To'xta, hali kech emas, to'xta! Uyingga qayt, o'zligingga qayt. Sen boshqacha hayot uchun, boshqa maqsad uchun yaratilgansan! Sen baxtli bo'lishing kerak!
Qizlarim, ona qizlarim…
Fotima Manzur
(Abu Muslim, erkin tarjima)
***
To'lmasdan o'n olti yoshingga,
Qalamlar tortildi qoshingga,
Savdolar ortirma boshingga,
Shoshilma qizgina, shoshilma!
Noziksan qizg'aldoq loladan,
So'ragin mehribon onadan,
Farqing yo'q hali yosh boladan,
Shoshilma qizgina, shoshilma!
Ishq emas sen bilgan o'yinchoq,
Qo'lingda kelinmas, qo'g'irchoq,
Hozircha top boshqa ovunchoq,
Shoshilma qizgina, shoshilma!
Bo'yalmish top-toza yuzlaring,
Ranglardan ko'karmish ko'zlaring,
Noz ila bo'yalmish so'zlaring,
Shoshilma qizgina, shoshilma!
Ajinlar tushganda yuzingga,
Dunyo tor kelganda ko'zingga,
Bo'yoqlar toparsan o'zingga,
Shoshilma qizgina, shoshilma!
Bir kuni bo'ylashib bo'yingga,
Sovchilar keladi uyingga,
Ko'plashib boramiz to'yingga,
Shoshilma qizgina, shoshilma!
Присоединяйтесь к ОК, чтобы подписаться на группу и комментировать публикации.
Комментарии 1