ТЮРЛЕНГЕН ТЮРЛЮ СЮЮВ.

Гьайран арив кёк тёрюнде юлдузлар
Ай гечелер юм-чум этип ойнайгъан.
Не сюемен уланланы чартлайгъан
Сюйген досун гишилеге къоймайгъан.
Къынындан къылычын тартып сувуруп
Чабушмагъа чаба болгъан уланлар
Рази болгъан оьлтюрме де оьлме де
Сюйгенлери учун алдын заманлар
Гелешмиши гелин болуп гирмейли
Янын салып ятмагъан къарчыгъалар
Намарт бийлер къачыртсада сюйгенин
Чабушлар булан чыгъарып алгъанлар...
Бир тамаша заманлар алышынгъан
Яш наслулар таза сююв татмайлар
Алдын йимик булкъалагъа жыйылып
Улан къызгъа тийдирип сёз айтмайлар
Таза сююв болма герек тап-таза
Сюзюклюгю зем-зем сувгъа ошайгъан
Четимликлер айланмагъа айланып
Тартып алса,юреклерде яшайгъан
Ёкъ, гене башгъа болгъан заманлар
Сююв гьали акъча кепде оьлчене
Бар ерлеге барып батса къызлары
Гележегин ойламай бир тайпалар...
30.04.2019
Дайбат А.Салихова.