Предыдущая публикация
🍀🍀🍀КОЗОНЬ ЧАЧНЕСЬ «ЧЕВГЕЛИНАСЬ»?
Течи минек газетань инженек – Пенза ёнксонь Бессоновской буень Пазялго велень «Чевгелина» ансямблянь прявтось Понятова Людмила Николаевна. «Эрзянь правдантень» сон ёвтнесь коллективест ланга.
– Людмила Николаевна, инескеть, ёвтнеде эсенк ****: зярдо сон пурназель, мезе ды кода морсетядо?
– Минек «Чевгелина» ансамблянтень тедеде топодсть кемень иеть. Мелесь панжомс велень коллективной ансамбля чачсь пек умок. Ансяк те теевсь а сеске, яла меньгак тувтал лисиль. Ды мейле энялдынек Малюкова Антонина Ивановнанень ушодомс те тевенть. Музыкань тонавтыцятнестэ велесэнть ськамонзоль. Сюкпря тензэ, явсь мель те тевентень ды кармась коллективенть прявт ветиекс. Сон шабра Кижеватова велень. Юткстонок ськамонзо мокшонь аваль, лиятне – эрзят. Кавтотне лия райононь эрзянь Вышелей велестэ. Васенцекс саинек кезэрень пингень рузонь моронть, конань морсесть минек покштятне-бабатне… Те умонь морось ульнесь гусар ланга. Мейле карминек морсеме лия мороткак. Прявтонок мелезэ ульнесь вельмевтемс эрзянь кезэрень моротнень. Минь карминек яксеме сыре ломантнень ланга, морамост сёрмадынек аудиос. Мейле Антонина Ивановна сёрмадсь лангозост музыка. Истя витевсть-теевсть зярыя морот. Цела морот арасельть, пельксэнь-пелькс пурнынек эйсэст, кой-кува минсь поладылинек.
Шкань ютазь минськак сёрмадынек сисемшка морот. Валтнэ монь, музыкась А. И. Малюковань. Минек моротне – «Тиринь веле», «Чевгелина», конась кармась ансамблянть невтевксэкс. Морсетяно рузонь ды эрзянь кельтнесэ.
– Тынь пурнавиде вейке курос ды кода кармась ютнеме «Покш эрзянь чись»?
– 2009 иестэ велень чинть тешкстамо пурнавкшность велень весе эрицятне. Минек велесэ пек мазыйстэ ютавтневить кенярксчитне: Троицясь, лиятне, конат, нама, моровтомо зярдояк эзть ютне. 2013 иестэ саезь кармась ютавтневеме «Покш эрзянь чи» лементь ало кенярксчись. Тедеденсесь ульнесь ветецеде ды тешкставсь Троицянть марто вейсэ. Эдь покштятнень-сырькайтнень ледстнема субутантень сакшныть эрьва ёндо пек ламо ломанть. Те тувталось кармась покш чинь ютавтомань юрокс. Ломантне сыть оймсеме, калмолангов покштяст-бабаст ледстямо ды теке марто тиринь кельсэ кортнемеяк. Троицянь чись свал пек мельстуиця, оймень-ёжонь витиця. Сестэ кенярксчисэнть ульнесть ансяк эсенек веленсетне, теке мерят, вейке покш семия пуромкшнось ве кужос. Весе морасть, кецнесть вейке-вейкенень. Ней жо ардыть эрьва ёндо, ламотнень а содасынекак, минь жо мельспаросотано, веленек ланга содыть ламодояк ламо ломанть… Ды тень кувалма миненек путсть истямо мазый сцена, косто гайгить моронок ды ве пельде неявить мазый оршамонок.
– Людмила Николаевна, маринь, тынь тонавтыця? Мезес тонавттадо школасо?
– Истя, васенце профессиям – рисованиянь ды черчениянь тонавтыця, омбоцесь – вишка класстнэсэ тонавтыця. Школасо ней ютавтнян музеень урокт, бажан эйкакштнень марто кортнемс эрзякс. Кадык куш аламодо содыть ды марить келенть, а стувтнить эйсэнзэ. Школасонть ней кадовсть ведьгемень тонавтницят. Те аламо…
– Ули-арась велень клубонк?
– Зярдо-бути клубонок ульнесь. Ды палокшнось. Секскак ней весе мероприятиятне ютавтневить теске. Те таркась ловови минек велень культурной центракс.
– Кить совить «Чевгелина» ансамблянтень?
– Морыцянок, ловт, весе пенсионерт: икелень библиотекарь, медроботник, школань техничка ды лия профессиянь ломанть. Васня эйстэденек ульнесь кевейкее ломань, колмотне тусть. Кадовсь баянисткась Малюкова Антонина Ивановна, морыцятне: Вдовина Зинаида Степановна, Родионова Надежда Петровна, Песчаскина Татьяна Владимировна, Тихонова Надежда Фёдоровна, Косточева Вера Николаевна, Любавина Валентина Михайловна.
– Косо ульнесь ансамблянк?
– Минь ёвтатано покш сюкпря Мордовиясто Раиса Борисовна Щанкинанень, кона свал ковгак тарги эйсэнек. Зярыяксть ардтнинек Саранскоев. Минь ульнинек «Вастома» областной фестивалень участникекс. Ды ялатеке сехте пек вечктяно морсеме эсенек тиринь моданок лангсо, косо касынек-чачинек, косо ашти тиринь кудонок.
Марина Слугина
Марина Девятова
#газетаЭрзяньправда
#саранск
#мордовия
#эрзя
Следующая публикация
Нет комментариев