Қарилик-да, “қулоқ - оғирроқ”,
Қовоқларим тўсган кўзимни.
Кимнинг боласисан, шунқорим,
Берироқ кел, танит ўзингни.
Қарилик-да, айбга йўйма,
Кун санамай қўйдик буёғи.
Қўлингда гул, хойнахой яна
Табриклашга келибсан чоғи.
Ҳа айтганча, тўққизинчи май...
Эсладимми, ошади диққат.
Гулингни бер, дуо қилайин,
Уруш ҳақда сўрама фақат.
Тинчлик ҳақда гапиргин, болам,
Шуни истар бу – “эзма чоллар”.
Биз урушдан орденлар тақдик,
Сен тинчликдан таққин медаллар.
Қисмат экан, “бомба”лар кечиб,
Оёқ-қўлни бердик урушга.
Сен уларни тинчликка ишлат,
Жанг хаёли тушмасин бошга.
Автоматга суяндик бизлар,
Дунё ҳамон чекади озор.
Сен кетмонни қўлингдан қўйма,
Дарахт эккин, яратгин гулзор.
Жангда ўлди минглаб истеъдод,
Ичда кетди минглаб панд-ўгит.
Биз “қора хат” ёздик урушда,
Сен тинчликка мадҳиялар бит.
Яхши бўлгин, ҳаммадан яхши
Токи бизни кечирсин олам.
Биз урушда одам ўлдирдик,
Сен инсонни асрагин, болам.
Жанг майдони – ўлим майдони,
Ажал билан жангга киришдик.
Гитлерини танимайман мен,
Биз урушга қарши уришдик.
Боболар ҳам ғанимат, қўзим,
Сенинг бошинг кўрмасин офат.
Гулингни бер, дуо қилайин,
Уруш ҳақда гапирма фақат.
Қадрласанг, топасан қадр,
Йўқлашингни савобга йўйгин.
Чексиз ҳурмат ва рахматимни
Президентга етказиб қўйгин.
(Ахтам Рузимурот)
Присоединяйтесь к ОК, чтобы посмотреть больше фото, видео и найти новых друзей.
Нет комментариев