Так выглядаў наш горад пасля таго, як выгналі немцаў. На фота бачная вуліца Замкавая. Брук і тратуары з бетонных плітаў, зробленыя пры Польшчы. І - выпаленая ўся забудова.
А забудова Замкавай вуліцы, як і ўсяго цэнтра Глыбокага, была драўляная і вельмі густая. Немцы ў апошнія два дні перад адступленнем палілі горад, стараліся знішчыць усё. Праўда, мелі мала часу. Таму засталіся ўскраіны, асабліва там, дзе забудова не была шчыльная і агонь не мог перакінуцца з аднаго дому на другі. Ведаю таксама аповеды двух чалавек з розных канцоў Глыбокага, што іх дамы немцы спрабавалі падпаліць, але яны не ўгарэліся, і акупанты ўжо не мелі часу, каб падпаліць як след.
Мураваныя камяніцы, якія мы бачым у цэнтры Глыбокага, таксама пераважна былі згарэўшы, захаваліся толькі сцены. Пасля вайны гэтыя сцены адбудоўвалі, і таму можа скласціся памылковае ўражанне, што вайна не надта кранула горад.
З правага боку на вуліцы Замкавай бачым будынак Камунальнай Касы Ашчаднасці, збудаваны ў 1938 годзе. Хутка пасля вызвалення Саветы арганізавалі ў Глыбокім кансервавы завод - будынак Касы прыстасавалі пад кантору, а для вытворчых будынкаў прадугледзелі месца на дне сажалак Капаніцаў, якія да вайны былі ўлюбёным месцам адпачынку глыбачанаў, і якія Саветы спусцілі. Цяпер ужо збанкрутаваў гэты завод.
Гэты фотаздымак, датаваны 11.07.1944, дадае важны штрых да гісторыі царквы Раства Багародзіцы, былога кармэліцкага касцёла. На фота бачны драўляны купал, які праваслаўныя збудавалі ў 1908 годзе. Летам 1944 года ён згарэў і не быў адбудаваны, у выніку чаго дах святыні выглядае "пусты". За часоў Кармэлітаў ён так не выглядаў, бо дах быў вышэйшы, больш стромкі і меў бакавыя франтоны над трансептам.
Дык вось, акалічнасці пажару, які знішчыў купал, дакладна невядомыя. Ад жыхароў Глыбокага даводзілася чуць чатыры розныя версіі: 1) што купал падпалілі немцы перад адступленнем, 2) што купал загарэўся ад залпу савецкіх "Кацюшаў" падчас штурму Глыбокага, 3) што купал загарэўся, калі савецкія жаўнеры выкурывалі немца (снайпера?) які заставаўся на гарышчы царквы, калі Саветы ўжо прыйшлі, 4) што купал загарэўся ў выніку пажару, які ўсчалі адмыслова ці праз неасцярожнасць савецкія жаўнеры ў складзе спірту, які быў побач з царквой.
Якая з гэтых версій праўдзівая - мы не ведаем. Можа, і ніводная. Але дзве першыя дакладна адпадаюць, бо з фотаздымка вынікае, што 11 ліпеня 1944 года, праз дзевяць дзён пасля вызвалення Глыбокага, купал на царкве яшчэ быў.
Присоединяйтесь к ОК, чтобы посмотреть больше фото, видео и найти новых друзей.
Комментарии 3