***
Туро ман дӯст медорам,
На бо он хотире, ки бемисолӣ,
На бо он ки басо соҳибҷамолӣ.
Туро ман дӯст медорам ба он хотир,
Ки дар ақлу заковат баркамолӣ.
----
Ту зебоӣ,
Бале, бисёр зебо,
Ба мисли ғунчаҳои навбаҳору навшукуфта,
Ба монанди суханҳои тару, боре нагуфта,
Ба сони гавҳаре, ки дар дили дарёст, бинҳуфта.
----
Вале афсӯс ...
Ҳазор афсӯс, ки бар ҳусну ҷамолат,
Ба он қалби мусаффову зулолат,
Ба чашми интизору пурсаволат,
Наметонам, ки қалбамро супорам
Наметонам бароят бахт орам.
----
Ба он хотир, ки танҳо як диле дар синаам дорам,
Ки онҳам соҳибе дорад.
Ба он хотир, ки ҳатто риштаи дил нест андар ихтиёрам,
Ки бар дастат супорам.
----
Ту бояд нағз донӣ, ки нашояд,
Ману ту мисли ҷуфте дар самои ишқ бо ҳам,
Кушоем болҳо, парвоз созем.
Ба мисли мурғакони дур аз ғам,
Ҷаҳони дигареро боз созем.
----
Ту мехоҳӣ, ки соҳибхонае бехона гардад?
Ту мехоҳӣ магар, гунҷишкаке белона гардад?
Барои он ки шояд бахт ёбӣ,
Барои он ки дар қасри муҳаббат, тахт ёбӣ,
Ту мехоҳӣ, бинои дигаре вайрона гардад?
На,
Намехоҳӣ,
Ман инро хуб медонам, ки ҳаргиз ҳам намехоҳӣ.
----
Ту худ андеша бинмо, з-он ки як шахси аёлмандам,
Ба бахти хеш дорои зану якчанд фарзандам.
Агарчӣ дӯст медорам туро, аммо дари дил
Бубахшо, ки ба рӯи ишқи ту дониста мебандам.
----
Ба он хотир, ки дар пайроҳаи ишқ,
Раҳи мо дигару, фосилаҳо дур.
Нашояд ,токи бошам ошиқи ту,
Маро гар метавонӣ, дор маъзур.
----
Умедворам, ки аз ин гуфтаҳоям,
Нагардад даври рӯят ашк ҷорӣ.
Фақат хоҳам, табассум дар лабонат
Шукуфад мисли гулҳои баҳорӣ.
----
Туро ман дӯст медорам,
Бале, иқрор бояд шуд.
На бо он ки ҳамоғӯш гашта боҳам ком ронем,
На бо он хотире, ки аз ду чашми ҳамдигар афсонаҳои ишқ хонем.
Туро ман дӯст медорам ба он хотир,
Ки танҳо дӯст будем,
Дӯст ҳастем,
Дӯст монем.
----
Туро ман дӯст медорам, бале иқрор бояд шуд,
Ки як шахси наҷиб астӣ,
Зи хислатҳои хубу неки инсӣ бонасиб астӣ,
Ба дарди ҳар давохоҳе шифоҷӯву табиб астӣ.
Аҷиб астӣ...
Бале, бисёр аҷиб астӣ.
--
Агарчи хоксорӣ мекунӣ, аммо малакхӯйи,
Ба замми он ки зебоӣ, басо дилёбу дилҷӯйи
Ва ҳатто баҳри роҳгумкардае сад роҳ меҷӯйи.
-
Вале афсӯс...
Бар роҳи ману ту чора ҷустан ногузин аст,
Ки ҳукми қисмати моён чунин аст,
Ба байни роҳи мо девор мисли садди Чин аст...
-
Ба ин хотир набояд ҳарфе ҷуз аз дӯстӣ гӯем,
Гули хушкидаи армонҳоро бесамар бӯем.
Барои эҳтироми якдигар ҷуз роҳи дӯстимон,
Нашояд роҳи дигар, роҳи пурхавфу хатар ҷӯем.
-
Биё то он даме, ки зиндаему соҳиби ҷонем,
Чунон, ки дӯст будем, дӯст ҳастем, дӯст монем!
МУРОДИИ ХАТЛОНӢ.3.07.2018.
Присоединяйтесь к ОК, чтобы посмотреть больше фото, видео и найти новых друзей.
Комментарии 2