=== прасілі расказаць ===

УЛАДЗІСЛАЎ НЯДЗВЕДСКІ
Як вядома, Мікашэвіцкая гімназія носіць імя Уладзіслава Нядзведскага, але не ўсе ў горадзе ведаюць пра яго і прасілі расказаць.
Уладзімір Іосіфавіч Нядзведскі нарадзіўся 24 07 1929 года каля вёскі Рахавічы былога Ленінскага раёна (цяпер Хорастаўскі с/с Салігорскага раёна ) у шматдзетнай сям'і.
У час Вялікай Айчыннай вайны тыя мясціны знаходзіліся ў партызанскай зоне. У 1943 годзе немцы пачалі блакаду гэтай зоны: палілі і забівалі ўсё і ўсіх. Сям'я Нядзведскіх ратавалася ў лесе, але трапіла пад расстрэл, удалося ўратавацца толькі Уладзіславу і сястрычцы Віні. Сіротам даў прытулак мацерын брат. У першы пасляваенны год дзядзька адвёз хлопчыка на кватэру ў Мікашэвічы, каб навучаўся ў школе, на аснове якой пазней быў адкрыты дзіцячы дом, тут жылі і навучаліся Уладзіслаў з Віняй, Тут з 1948-га года Уладзіслаў працаваў старшым піянерважатым. Адсюль у 1950-м годзе ён паступіў на філфак Беларускага дзяржаўнага універсітэта.
Пасля заканчэння універсітэта працаваў настаўнікам у Лагойскім раёне, потым працаваў на Беларускім тэлебачанні, у часопісе "Маладосць", і як вяршыня працы - у выдавецтве "Мастацкая літаратура".
Пісаў вершы і прозу з юначых гадоў. За свой нядоўгі век змог выдаць дзясяткі кніг. Значную частку ў іх займае тэма вайны, перажытага болю і памяці. Ёсць і творы пра дзіцячы дом, пра Мікашэвічы ( у аповесці "Хлопцы з другога корпуса" яны - як Кірмашэвічы ).
Нядзведскі трагічна загінуў у аўтакатастрофе 17 кастрычніка 1973 года.
P.S. Да 1960 года ў нас існаваў Ленінскі раён. У семнаццацігадовым узросце я ўжо друкаваўся ў раённай газеце "Ленінская праўда": пісаў заметкі, замалёўкі і вершы, таму мяне запрашалі на літаратурныя паседжанні, якія вёў Аляксей Гардзіцкі - будучы вядомы пісьменнік-крытык. На тыя паседжанні запрашаўся і Удадзіслаў Нядзведскі. Дзве сустрэчы з ім сыгралі ў маім лёсе вялікую ролю
Пра гэтыя сустрэчы і пра сустрэчы з іншымі пісьменнікамі, што былі ці жылі на Лунінеччыне, я ўвасобіў у сваім зборніку нарысаў "Сустрэчы і расставанні ". ( "Лунінецкая муза" 2009 ).