Чыдамлыкъ Гьай, чыдамлыкъ, ташлап къойма етимни, Халкъ арада къара этме бетимни. Ийленгенмен гён чарыкъдай дюньяда, Ожагъыма гирди той да, гьуя да. Къысмат мени не ерлеге элтсе де, Гьайкел болду анам берген гьалаллыкъ. Яшамагъа гьакъыл бердинг, гюч бердинг, Инг макъталгъан къылыкълардан – чыдамлыкъ. Зайнарбек Зайнарбеков
Бузулмакъ бар юрегим Мен гёрмейим гьеч бир де Къашынг тююп сен магъа. Билмей бусанг, айтайым Гьашыкъ болгъаным сагъа. Гече ятсам юхлама, Юхумну сен бёлесен. Янгыз къалып, уьй сакълап, Айт да не гюн гёресен? Ант этсем де, ант етмес, Тасдыкъ этип сёзлерим. Инан, башгъа гёзлеге Гьеч къарамай гёзлерим. Оьзюнг яхшы билесен Ким гьашыкъны бек сагъа. Бузулмакъ бар юрегим, Сёз берсенг сен башгъагъа. Абдулманап Порсукъов
Къаламым Сагъа аркъа таяйман Итти мени къаламым. Сени булан тез ете Ювукъ-досгъа саламым. Къаламым бар къолумда Чечме юрек сырларым. Сен болмасанг, билемен, Язылмажакъ йырларым. Къалам булан мен чыкъсам, Бек тюзеле ёлум да. Гюнден-гюнге къаламым Къата бара къолумда. Ювукъ-досум аз тюгюл, Болса хатам гечеген. Къаламыма минг макътав Сырларымны чечеген. Абдулманап Порсукъов