Нарэшце можна падвесці вынікі вясновай міграцыі беларускіх вялікіх арляцоў, бо асноўная іх колькасць ужо дома.
На жаль, не абышлося без страт. 😢
З высокай імавернасцю можна казаць, што самец Джо загінуў яшчэ 25 верасня мінулага года падчас восеньскай міграцыі недзе ў Хмяльніцкай вобласці Украіны, а самец Рад – падчас вясновай міграцыі 15 сакавіка гэтага года на Турэччыне, недалёка ад мяжы з Сірыяй.
🦅 Засталося 15 птушак з перадатчыкамі, якія працуюць. З іх толькі адзін самец Тур не даляцеў яшчэ да месца гнездавання. З ім нешта дзіўнае здарылася. Вось ужо тыдзень ён сядзіць у балоце каля Ровенскага прыроднага запаведніка і нечага чакае. Да мяжы з Беларуссю 20 км, да ягонага гнязда – 60 км. Добрым надвор'ем са спадарожным ветрам такі шлях займае ў арляцоў адну гадзіну. Але птушка жывая, гэта відаць па тэмпературы цела і паказчыках акселерометра. Будзем за ёй назіраць далей.
Прылёт астатніх 14 птушак у сярэднім адбыўся троху раней за папярэднія сезоны. 6 птушак сёлета нават пабілі індывідуальныя рэкорды самага ранняга прылёту за 6-7 гадоў назірання. Толькі 3 птушкі прыляцелі як заўжды, толькі адна (Блонд) – пазней, дакладней, найпазней за 7 апошніх гадоў.
Магчыма, да Блонда ў гэтай статыстыцы далучыцца Тур. Дарэчы, менавіта праз Блонда першая вясновая рэгістрацыя вялікага арляца ў Беларусі адбылася так позна – 22 сакавіка, бо на ім адным кожны год трымаўся гэты паказчык. Гэта лішні раз паказвае, што прылёт першай асобіны нічога не кажа пра ход міграцыі, трэба чакаць астатніх і глядзець на сярэднюю дату.
Дзякуем за тэкст арнітолагу Валеру Дамброўскаму. 🙌
Присоединяйтесь к ОК, чтобы посмотреть больше фото, видео и найти новых друзей.
Нет комментариев