Пайғамбаримиз соллаллоҳу алайҳи ва саллам фарзандларимизга ўргатишимиз керак бўлган уч хислатни айтганлар. Бу ҳадиси шарифни муҳаддислар Имом ад-Дайламий раҳимаҳуллоҳ, Абу Наср аш-Шерозий раҳимаҳуллоҳ, Ибн ан-Нажжор раҳимаҳулоҳ кабилар ривоят қилган бўлиб, уни Имом ас-Суютий раҳимаҳуллоҳ “ал-Жомеъ ал-кабир” асарида, Имом ал-Муновий раҳимаҳуллоҳ “Файз ул-қадир” асарида ҳамда ал-Муттақий раҳимаҳуллоҳ “Канз ал-уммол” асарида келтирганлар. Мазкур ҳадиснинг иснодини ҳадисшунослар заиф деб баҳолаган бўлсалар-да, лекин, унинг матни бизнинг кўзимиз нуридир, қалбимиз суруридир.
Ҳазрати Али каррамаллоҳу важҳаҳу ривоят қилишларича, Расулуллоҳ соллаллоҳу алайҳи ва саллам бундай деб марҳамат қилганлар:
أدّبوا أولادكم على ثلاث خصال حبّ نبيّكم و حبّ أهل بيته و قراءة القرآن فإنّ حملة القرآن فى ظلّ الله يوم القيامة يوم لا ظلّ الا ظلّه مع أنبيائه و أصفيائه
“Болаларингизга учта хислат билан одоб ўргатинг! Пайғамбарингизни севишни, унинг оиласини севишни ва Қуръон ўқишни таълим беринг. Зотан, Қуръон қорилари қиёмат кунида Аллоҳ таоло Аршининг соясида бўлади. Фақатгина Аршнинг сояси бор пайтда Аллоҳнинг пайғамбарлари ва соф бандалари билан бирга бўлади”.
1)Фарзандларимизга таълим беришимиз, ўргатишимиз керак бўлган энг биринчи нарса севимли пайғамбаримиз Муҳаммад Мустафо соллаллоҳу алайҳи ва салламнинг муҳаббати экан. Ул зотга ота-онамиз ва жонимиз фидо бўлсин!
Бунинг учун Расулуллоҳ соллаллоҳу алайҳи ва салламни фарзандларга танитмоқ керак! У зоти шарифнинг номларини, кўринишларини, сифатларини, ажойиб хислат ва фазилатларини билишлари керак. Келиб чиқишлари, ота-оналарининг номлари, қандай умр кечирганларини билишлари керак. Бунинг учун эса ота-оналарнинг ўзлари буни билмоғи лозим. Пайғамбаримиз соллаллоҳу алайҳи ва салламнинг номларини тилга олиб, “Муҳаммад пайғамбар бундай деди, ундай деди” дегувчи ота-оналардан нима кутиш мумкин?! “Ла илаҳа иллаллоҳ, Муҳаммаду-р-Расулуллоҳ!” калимасини ҳам тўлиқ айта олмайдиган мусулмондан нима кутиш мумкин?! “Соллаллоҳу алайҳи ва саллам” ёки “алайҳиссалом” деб саловат айтишни ҳам билмайдиган мўъмин ҳақида нима дейиш мумкин?! “У зотнинг бешигини чайқадингми?!”, дейдиган одам йўқ! “Мавлиди шариф”да бундай байт бор:
Жумла Пайғамбарларни Тангрим номи бирлан чорлади,
“Ё Набий!” деб чорлади, Сизни Худо, хуш келдингиз!
Аллоҳ таоло ҳам Қуръони каримда Пайғамбаримиз соллаллоҳу алайҳи ва салламнинг номларини атаб хитоб қилган эмас. Ул зоти шарифнинг номлари Қуръони каримда фақатгина тўрт мартагина келтирилган бўлиб, у ҳам бўлса, маълум бир муҳим маълумотни етказиш мақсадида эслаб ўтилган. Расулуллоҳ соллаллоҳу алайҳи ва салламга хитоб қилинмоқчи бўлса, “Эй, Пайғамбар!”, дейилган. Шунинг учун ҳам, пайғамбарлик даврларида кофир ва мушриклар ул зоти шарифни “Муҳаммад” деб аташар эди, мунофиқлар эса “Абулқосим” дейишарди. Мўъмин-мусулмонлар бўлса, “Расулуллоҳ”, деб мурожаат қилар эдилар.
Расулуллоҳ соллаллоҳу алайҳи ва салламни танимоқ учун у зотнинг тарихлари битилган асарларни – сийрат китобларни, пайғамбарлар тарихи ёзилган китобларни ўқиб туриш керак. Уйларида бирорта диний мазмундаги китоб йўқ хонадонда ихлосли мўъмин-мусулмонлар яшаши даргумондир.
Расулуллоҳ соллаллоҳу алайҳи ва саллам оламларга раҳмат қилинган. У зоти шариф қоронғида ҳам кўрар эдилар, орқа томонларини ҳам олдилари каби кўрар эдилар, узоқ-узоқларни ҳам худди кафтларини кўриб тургандек кўрардилар. У зот узоқ-узоқлардаги овоз-сасларни ҳам эшитардилар. У зотнинг соялари ерга тушмаган. Қоронғида игнасини йўқотганлар у зоти бобаракот кулганларида ҳужра ёруғ бўлиб кетганидан ўз игналарини топиб олишган. Бошини силатган болаларнинг бошларидан у зотнинг хушбўй қўлларининг асорати ҳафталаргача кетмаган, у зот бирор жойга кириб келсалар, ҳали кириб келишларидан олдин у зотнинг хушбўй тароватлари кириб келар эди. Саҳобалар у зот терлаганда оққан терларини силаб-сидириб олиб, ўзларига атир сифатида ишлатиб юришган. Шу билан бирга, у зот жуда-жуда камтар эдилар, жуда-жуда уятчан, жуда-жуда меҳрбон эдилар. Биз ана шундай буюк Пайғамбарнинг умматимиз!
2)Пайғамбаримиз алайҳиссаломнинг аҳли байтлари – оилалари ва авлодларини севишни фарзандларга ўргатиш керак экан. Имом ал-Бухорий раҳимаҳуллоҳ ривоят қилишларича, Расулуллоҳ соллаллоҳу алайҳи ва саллам: “Оиламда фақат яхшилик бор, деб биламан!”, деганлар (Бухорий, 3/2637).
Расулуллоҳ соллаллоҳу алайҳи ва саллам бутун умматга бўлган энг охирги васиятларини “Ҳажжат ал-вадоъ”да – “Видолашув ҳажи”да айтганлар. Жумладан, унда мана бундай деганлар: “Мен сизларга икки нарсани ташлаб кетувчиман. Улардан биринчиси, Аллоҳнинг китоби. Унда ҳидоят ва нур бор. Кимки уни маҳкам ушласа ва ундан (ҳукм) олса, у ҳидоятда бўлади. Кимки уни хатога чиқариб, тарк қилса, у залолатда бўлади. Иккинчиси, аҳли байтимдир. Сизларга аҳли байтим борасида Аллоҳни эслатаман!” (Термизий, 5/3786; Насоий, 5/8175; Доримий, 2/3379; Байҳақий, 7/13017: Ибн Хузайма, 4/2357;). Расулуллоҳ соллаллоҳу алайҳи ва саллам: “Сизларга аҳли байтим борасида Аллоҳни эслатаман!”, деган гапларини уч бора такрор қилганлар. Яъни, оилалари ва авлодларига яхши муносабатда бўлишда Худони эсдан чиқармасдан муомала қилишни буюрганлар. Авлодларни ҳурмат ва иззат қилиш аждодларнинг ҳурмати ва иззатидир!
Имом Ҳоким раҳимаҳуллоҳ саҳиҳ деб келтирган ҳадисда: “Аҳли байтим Нуҳнинг кемасига ўхшайди. Ким унга минса, нажот топади. Ким унга хилоф қилса, ғарқ бўлади”, дейилган (Ҳоким, 3/3312). Бошқа бир ҳадисда эса “Авлодим умматим орасидаги омонликдир!”, дейилган.
Демак, фарзандларни Расулуллоҳ соллаллоҳу алайҳи ва салламга тааллуғи бор барча нарсаларни ҳурмат ва иззат қилишга ўргатиш керак экан. Пайғамбаримиз алайҳиссаломнинг авлодлари бўлмиш саййидлар, эшонлар, миёнлар, алавийлар, шарифлар кабиларнинг ҳурмати ва иззати ўз жойига қўйилмоғи лозим. Чунки, бу ҳам Пайғамбаримиз алайҳиссаломнинг васиятлари ҳисобланади.
3)Қуръон ўқишни ўрганиш ва ўргатиш ҳам мусулмонликнинг фарз амалларидан бўлиб, энг камида икки сурани (масалан, “Фотиҳа” ва “Ихлос”) ёддан билмоқ ҳар бир мусулмонга зарур. Қуръони каримни китобдан ўқишни ўрганиш ҳам лозим. Унинг зарур эканлигини бутун бор вақтлар ибодат билан ўтказилиши керак бўлган ҳаж ва умрага борган мусулмонлар чуқур англаб етишади.
“Сизларнинг энг яхшингиз Қуръон ўрганган ва уни ўргатган кимсадир!”, деган ҳадиси шариф мавжуд. “Кимки Қуръон ўқиса ва ундаги ҳукмларга амал қилса, унинг ота-онасига иёмат куни тож кийдирилади. Унинг нури дунёдаги қуёш нуридан кўра ҳам ёруғроқдир. Ана энди, сиз амал қилган кимсанинг ўзига нима берилишини ўйлайсизми?!”, деган мазмундаги ҳадиси шарифни кўпчилик эшитган бўлса керак. Имом ат-Табароний раҳимаҳуллоҳ эса мана бу ажойиб ҳадиси шарифни ривоят қилганлар: “Кимки ўғлига Қуръонга қараб ўқишни ўргатса, Аллоҳ унинг ўтган ва келаси гуноҳларини мағфират қилади. Агар унга зоҳирда – ёддан ўқишни ўргатса, Аллоҳ таоло қиёмат куни уни ўн тўрт кечадаги Ой суратида тирилтиради. Унинг ўғлига эса “Ўқи, ҳар бир ўқиган оятинг учун Аллоҳ азза ва жалла отангни бир даражага кўтаради”, дейилиб, то Қуръондан охирги ўқиган оятигача даражаси ортиб боради” (Табароний, 1/1956).
Мусулмон инсон ўзидан кейин бирор оят Қуръон ҳам ўқиб билмайдиган, унинг ҳаққига оятлар тиловат қилиб бағишлай олмайдиган фарзандлар қолдириши жуда ачинарлидир!
Қуръон ўқилганда, унинг ҳар бир ҳарфига ўнтадан савоб берилади. Қийналиб ўқувчига эса икки баробар ажр берилади. Китобдан қараб ўқилганда эса ажру савоб яна ортади. “Умматимнинг энг афзал ибодати Қуръонга қараб қироат қилишдир!”, деган мазмундаги ривоят ҳам мавжуд.
Хулоса. Ислом дини фарзандлар тарбиясига жуда катта эътибор қаратади. Расулуллоҳ соллаллоҳу алайҳи ва саллам ҳам бир қанча ҳадиси шарифларида фарзандлар тарбиясига алоҳида эътибор қаратишни таъкидлаб, таълим-тарбиянинг услубларини, турларини кўрсатиб берганлар. Ўғил болаларга сузишни ўргатиш кераклигини, қизларга эса тўқиш-бичишни ўргатишни тавсия қилганлар. Биз кўриб чиққан мазкур ҳадиси шарифда эса Расулуллоҳ соллаллоҳу алайҳи ва саллам фарзандларга уч нарсани ўргатиш лозимлигини, улар уч хислат билан камолга етмоғи кераклигини айтганлар. Улардан биринчиси, ислом пайғамбари, оламларга раҳмат бўлмиш Муҳаммад Мустафо соллаллоҳу алайҳи ва салламни севиш хислатини сингдиришдир. Иккинчиси эса Расулуллоҳ соллаллоҳу алайҳи ва салламнинг аҳли оилалари, шунингдек, саййидзода ва эшонзодалар каби у зотнинг зурриёт-авлодларини ҳурмат ва иззат қилишни таълим беришдир. Фарзандларимиз эгаллаши керак бўлган учинчи хислат бу – Қуръон ўқишни билишларидир. Қуръон барча яхшиликлар манбаидир. Уни ёддан ёки китобдан ўқишнинг ўзиёқ ибодатдир. Фарзандларимиз биздан кейин ўзлари билиб-тушуниб, бизларга атаб Қуръон ўқиб туришлари қандай ҳам яхши!
Хуллас, фарзандларингизни Расулуллоҳ соллаллоҳу алайҳи ва саллам кўрсатмаларидаги уч хислат билан камолга етказинг!
Присоединяйтесь к ОК, чтобы посмотреть больше фото, видео и найти новых друзей.
Нет комментариев