"
(Добрая сказка на сон грядущий)
...Эрясть-аштесть атят-бабат. Сынст ульнесь кардазсэ сеяст. Истя жо сырине - кеменьшка иеть андсь ломантнень ловцодо ды топодо. А зяро сеинеть сон левксыясь те шканть перть?! Кавто кедень сурсо а лововить...
Ды вана сась шка, зярдо лоткась те сеясь ловцонь максомадо. Атят-бабат ковонь перть учить пельдензэ ловцо, яла кемить: таго карми максомо! Арась, манчевсть неть кемематнесэ. Арась, а чуди ловцось сеянь кавто потетнестэ! Ды, неявсь, неть кавто потетне, кавто "суртнэ", кармасть вишкалгадомо ды пужомо. Вай, Инешкипаз!
- Мезе ней карматано те сеянть марто тееме? - кевкстни бабинесь мирдензэ. - Лисни, тикшенть стяко лангозонзо ютавнетяно?! Тонсь чарькодть: виенек эдь прядовсть, седе тов тикшесь тенек а ледеви, а пурнави, а ускови паксясто кудо малав...
- Истямс истя, - стакасто лекстязь пшкадсь каршонзо атинесь. - Аште-ка, аште-ка, вана мезе сась монь превс! Паряк, панемс эряви те сеянть кардазсто? Кадык велень лия сеятнень марто яки-паки олячива! Тонсь неят, сеятне сынсь мукшныть эстест ярсамопель. Ванта, зярошка вирь касы перьканок!
... Ды истя тейстькак атят-бабат. Нолдызь сыре сеянть олячис. Кадык каштангали!
Те тевесь ульнесь тундонь порава. Кизэсь уш ютась, сексеськак, вай, ютамо лангсо... Ды мезе лись седе тов?! Сыре сеясь сась эсь азортнэнень мекев! Косто сась - вирьстэ эли веле пестэ, кияк теде а соды. Ансяк сась кудов пек рана валске. Сась ды кармась вальмало верьга вайгельсэ парамо... Вай, авакай!
Нама, содызь атятне-бабатне парамонзо кувалт эсь сеянть вайгелензэ! Маризь ды сеске содызь вечкевикс эсь ракшанть. Ды курок капшазевсть ушов. Лиссть кустембряс - сельмест тетькезевсть неемадонть... Сыре сеясь сась кудов аволь ськамонзо - кавто вишка сеялевкс марто!
- Вай, те мезе теевсь?! - кевкстни атянть бабинесь.
- А содан, а содан, ансяк седеем пешксе кенярксто! - сельведень пачк корты атинесь. - Вай, ней кармить колмо сеянок! Кода тенень а кецямс!
- А кода сынст ней трямс-кирдемс? - кевкстни сыре авась. - Тонсь кортакшныть: вийтне прядовсть...
- Арась, маряса эсь прям: од вийть кармасть тень само. Кортан апак кенгеле, кемть! - атясь нардызе кедьсэ човоньсэ лисезь ливезенть...
- Иля пеле! - евтызе меельце валонзо атясь. - Тикшеяк кодаяк таштатано сеянок туртов. Паряк, нуцькатне сыть тенек инжекс ды лездыть тенек? Эдь сеянь ловцонть весе вечксызь!...
Колька ЖИВАЕВ.
24.12.2020 г.
Присоединяйтесь к ОК, чтобы посмотреть больше фото, видео и найти новых друзей.
Нет комментариев