#тассрга100ел#мәрхәмәт
Иж-Бубый авыл тарихы музее, ТАССРның үсешенә өлешә керткән, авылыбыз тарихында тирән эз калдырган шәхесләр белән таныштыруны дәвам иттереп, бүген Рәмзия Арслангали кызы Хәлиуллина турында сүз алып бара.
“Мөхлисәле татар хатын-кызларының гүзәл үрнәге, мәгърифәт балкышының яктылыгын тоташтыручы яңа йолдыз”., - дип язды аның турында җирле шагыйрә, Рәмзия апаның коллегасы Нәсимә Сипова.
Халкыбызның милләт аналары булып танылганнарның күпчелеге ХIХ – ХХ гасырлар кисешендә пәйда булган татар хатын-кызларыбыз. Тарих фәннәре кандидаты Альта Мәхмүтова (4нче фотографиядә) алар рәтенә беренче мөгаллимәләр Ләбибә Хөсәенова, Фатыйха Аитова, беренче табибәләр Маһипәрваз Әхмәрова, Хәдичә Ямашеваларны кертә һәм мөселман дөньясында беренче, бердәнбер казыя Мөхлисә Нигъмәтуллина-Буби исемен дә атый. Галимәнең фикеренчә, милләт аналары бүген дә бар, шуларның берсе –районыбызда гына түгел, бәлки бөтен Җир шарына да сибелеп яшәгән татарлар арасында хөрмәткә ия Рәмзия Арслангали кызы Хәлиуллина.
ХХ гасыр азагында туган авылы Иж-Бубыйның тарихы, аның күренекле шәхесләренең язмышы белән кызыксынып, эзләнү эшләрен башлап җибәргән Рәмзия апага быелның сентябрендә 87 яшь тулган булыр иде. Аның зур планнар белән янып йөргән җиреннән кинәт кенә бакыйлыкка күчүенә дә озакламый 13 ел була.
Хезмәт юлын Лаеш районында башлап җибәргән Рәмзия Хәлиуллина 1971 елдан алып пенсия яшенә җиткәнче туган мәктәбендә дистә еллар математика фәнен укытты. Ул чорда Иж-Бубыйга урта белем алырга дип районыбызның күпсанлы авыллырыннан килгән укучыларның класс җитәкчесе итеп нәкъ менә Рәмзия апаны билгели иделәр. Үзе исән-сау булса, ел саен үткәрелә торган мәктәп дуслары очрашуларында ул үзенең шәкертләренең уңышлары белән горурланып, аларның үзенә карата әйтелгән рәхмәт сүзләрен ишетеп сөенеп утырыр иде, мөгаен.
Лаеклы ялга чыгарга вакыт җиткәч, тынгысыз педагог яңа эшчәнлеккә керешә. 1980 еллар азагында ул Иж-Бубый мәдрәсәсе тарихын өйрәнүгә юнәлеш алган мәктәп тарихы музееның төп оештыручысы булды: үзе җитәкләгән сыйныф укучылары белән бергәләп эзләнү эшләрен алып барды, йөзләгән кеше белән хат алышты, музей булачак бүлмәдә даими экспозицияләр булдыруга зур өлеш кертте. 1989 елда мәктәп тарихын яктыртучы музей сафка баскач, авылдашларыбызны дөньяның төрле почмакларында яшәүче милләттәшләребез, шул исәптән Сан-Франсискодан Шәмсия Апакай, Австралиядән Ләйлә һәм Сәгыйть Садрилар (2нче фотографиядә сулдан уңга беренче рәттә 2нче һәм 3нчеләр), Америка Кушма Штатларыннан Азадә-Гайшә Рорлих белән очраштыручы да Рәмзия апа булды. Аның тырышлыгы белән авылыбызда күп тапкырлар республика һәм регионара фәнни конференцияләр узды, аларда дәүләт эшлеклеләре, мәртәбәле тарих һәм тел галимнәре, язучылар һәм шагыйрьләр катнашты.
Иж-Бубыйдагы данлыклы уку йортының тарихын яңартуга зур өлеш керткән, гомере буе милләтенә хезмәт иткән ветеран-педагогның исеме, һичшиксез, Иж-Буби мәдрәсәсенең мәртәбәле мөгаллимнәре белән беррәттән тарих битләренә уелып калырга лаек.
Присоединяйтесь к ОК, чтобы посмотреть больше фото, видео и найти новых друзей.
Комментарии 1