Предыдущая публикация
Е т и м Э м и н а з
Девирар физ, алатзава дат1ана,
Фикирначир за ик1 жеда лагьана…
Ви шикил зи вилик ква хьи, атана,
Вуч идат1а чизавач хьи заз, ай, Эмин.
Ялцугъ Эмин, Цилинг Эмин заз сад я,
За куь т1варц1ел дамахзава, зун шад я.
Фана дуьнья дегиш хьанва, абад я…
Хабар гузва за ваз гила, кай, Эмин.
Туьквезбанар амач садни чилерал,
К1анибурни хуьзмач гила гъилерал,
Яр вили хуьз акъваззамач рекьерал,
Терг хьанава хьи муьгьуьббат лап, вай, Эмин.
К1анзни-дак1анз, хьанва чакай тумакьар,
Куьтен гана, къачуз тазва яракьар.
Авач к1валах, лугьузва чаз явакьар,
Дуьньядикай кефи бегьем хай Эмин.
Дуванбегри дуван изва пулунихъ,
Тух жезавач гьич, кьадар амач руфунихъ,
Яб гузамач къе ви гьахълу тир гафунихъ,
Гьахълувилин дуванбег яз хьай, Эмин.
Дуьньядал вун, гьич са эквни такуна,
Гьар жуьредин дердер-гъамар ч1угуна,
Веси- сала дустариз гьак1 хъувуна;
Чан аламаз, уьмуьрдин ц1у, кай Эмин.
Ширинагъад(и) туьк1уьрзава ч1алар ваз,
Гуз к1анзава дуьньядикай хабар ваз.
Амат1(а) яраб, Тамумакай дидар ваз,
Муьгьуьббатдин шуьрбетдикай хъвай Эмин.
Следующая публикация
Нет комментариев