Մի անգամ Աստված հայտնվում է մի երիտասարդի և առաջարկում ցույց տալ նրա ողջ կյանքի ընթացքը: Վերջինս համաձայնում է: Այդժամ Աստված երիտասարդին վեր է բարձրացնում, և նա տեսնում է իր ապրած տարիները: Այնուհետև նկատում, որ իր անցած ճանապարհներին կան կողք-կողքի քայլող զույգ ոտնահետքեր.
- Ո՞վ է ինձ հետ քայլում,- հարցնում է նա:
- Այդ Ե´ս եմ: Ես ուղեկցում եմ քեզ ողջ կյանքիդ ընթացքում,- պատասխանում է Աստված:
-Իսկ ինչու՞ է որոշ դեպքերում միայն մեկ զույգ ոտնահետք. ինչո՞ւ ես ինձ միայնակ թողել…- վհատված հարցնում է երիտասարդը:
Աստված ժպտալով պատասխանում է.
- Ո´չ, Ես քեզ երբե´ք չեմ թողել: Դրանք Իմ ոտնահետքերն են. քո կյանքի դժվարին իրավիճակներում Ես քեզ ձեռքերիս վրա եմ տարել…..........
Տե’ր, մխիթարիր ինձ ու սրտապնդիր, որպեսզի նեղությունները, դառնություններն ու վշտերը չընկճեն ինձ:
Արիացրո’ւ ինձ, որպեսզի կարողանամ զորակցել Քո սուրբ եկեղեցուն և զորակից լինեմ Քեզ` չարի դեմ մղված պատերազմում:
Ինձ հոգով բարձրացրու, որպեսզի չկորցնեմ Քեզանից սովորած հեզությունն ու խոնարհությունը, ազնվությունն ու վեհանձնությունը և միշտ ամուր կերպով կառչած մնամ բարուն: