Семык кечын адакат эрден
Куку вургыж муро йоҥгалтеш.
Тудын ойго, чонышко пурен,
Шинча вӱдым шӱлыкын луктеш.
Витле кок гана мылам солнен,
Эше витле кок ий шуко пеш,
Йокрок чон вургыжмо пагытем
Да кузе тынар илаш лиеш?
Витле кок ий сӧрмӧ ӱмырем
Авалан пеш пӧлеклем ыле,
Чон кугу эҥгекым кораҥден,
Илаш шке йочаж ден йыгыре.
Кукун шке пыжашыже укат.
Игыжым ок керт шке кугемден.
Могай изи поро кайыклан
Тулык игыжым ончаш коден?
Койышыж ден куку йӧслана,
Сылне кеҥеж кечын ойгырен,
Мурыжым ик жап вел колына,
Вара чодраш кая чоҥештен.
Авана гына ок керт монден
Курымешлан шӱм падрашыжым.
Поремдаш огеш лий нимо ден,
Шке йочам йӧршеш йомдарышын.
Чытен огыл мыйын авамат,
Тӱпсыкшо нерген увер колмек,
Лийын чон сусыр кугу азап,-
Тидым ужым пӧртышкем толмек.
Вашлиймыже уке йывыртен,
Куржын лектын огыл капка дек,-
Пуйто кӧ авамым вашталтен,
Огешат ӧндал мыйым ужмек.
Пеҥгыде авам лушкен каен,
Сусыргышо кайыкла пызлен,-
Нимогай дару ок керт полшен,
Пуйто изи юмыр пудырген.
Тыланем, Ош Поро Юмына,
Шокшым пурто йӱкшышо шӱмлаш.
Илыш икте, икте авана,
Вийым пу ойгырыде илаш!
Обработка Зинаида Кольчугина
Присоединяйтесь к ОК, чтобы посмотреть больше фото, видео и найти новых друзей.
Нет комментариев