МӘДӘНИЯТ ЙОРТЫ

Монда элек иске мәчет иде
Манарасы кисеп алынган,
Ә соңыннан, аның урынына
Мәдәният йорты салынган.
Бу тарихи, мөһим вакыйгага
55 ел тулган ,ләбаса!
Әйдәгез,бу бәйрәм уңаеннан
Күңел ачып алыйк, ичмаса!
Искә алыйк, ашкынып биегән
Апа-абыйларның яшь чагын,
Искә алыйк, җырлаткан,биеткән
Авылның шәп гармунчыларын!
Зал гел тулы була иде элек,
Кино карый идек көн-аша.
Богалышның укытучылары
Еш куялар иде тамаша!
Мәдәният йорты-ул авылның
Милли сәнгатебез учагы.
Шул учакны сүндермичә тора
"Ялкынның" егет һәм кызлары!
Бу бинаны төзеткән илебез
Тик тарихта гына калса да,
Тау ташыннан салынган диварлар
Гасырларга чыдар, иншалла!
Хафиз Галиев