Къуш бла тауукъну тамсили.

(Баснясы)
Тауукъ кёкде учхан къушха
Этди кёлю бла гурушха:
Нечик халкъгъа къайырылыб,
Джамагъатдан айырылыб,
Кесинг учаса мийикде,
Зауукъ табханча ол кёкде?
Ийнан, бизде да бард джашау,
Эркин ичги была ашау;
Бизге адам тепсисинден
Беред хантны игисинден.
Келсенг а биркюн къонакъгъа:
Шорпа къуйярбыз табакъгъа,
Сюйсенг челек толу помой,
Сюйсенг палау, сюйсенг джаркой,
Сюйсенг ауланмагъан бышлакъ,
Сюйсенг хызен бла доширак
Сюйсенг чара бла хуббеги,
Къуру суудан кёбге иги.
Аны бла къалмай гамайыб,
Артдан этмез ючюн аыйб,
Сыйлай сенича джаш- къушну
Бирден къазарбыз багушну,
Анда тири къымылдасакъ,
Эркинди къурт бла къамыжакъ.
Бийченг да ол ашдан къабар,
Кюнге эки гаккы табар,
Аны бла къуш юзюк айныр,
Таугъа, тюзге да джайылыр,
Кёрюрсе, бир сафда къушла,
Бирде уа къаз бла бабушла,
Аскер кибик тизинлешиб,
Суугъа джюрюрле бирлешиб.
Тозайтма, джаным, кёлюнгю,
Сени саулайда тёлюнгю
Джарыкъ джолгъа тюзетирге,
Адеб, намыс юретирге
Бизде да барды бир гиназ-
Гугурукку улу Хораз.
Кёрсенг эд сен аны кесинг,
Чартлаб чыгъар эди эсинг.
Анда уа барды бир чырай,
Тюгю алтынча джылтырай,
Томрау мычхыча тарагъы,
Къобхан ырхыча тамагъы,
Анда билим, анда фахму,
Айтхан сёзю- таза назму
Чынгаб къонса уа чалманга,
Ушайды шашмайын ханга,
Кёбчюлюкден къанат алгъан:
Джашау юлгюбюз - Хоразхан!
Ол къуш ашыкъмай, тынгылаб,
Анга былай берди джууаб.
Айхай, мийик уча билсенг,
Айгъа ёшюн бла тирелсенг,
Булутланы ёресинде,
Умутланы тёресинде
Бошлаб джюрек къууатынгы,
Эркин джайыб къанатынгы,
Джелде суудача джюзелсенг,
Къабынынгы да юзелсенг
Джаллы бёрюню аузундан,
Къанлы джауунгу ызындан
Джанган шыблача сюрелсенг,
Менге айыб этмезенг сен.
Огъай, кесимча къалайым
Шоркъа сууладан тояйым,
Джангыз тутсам да башымы,
Дамсыз джутсам да ашымы,
Талпыб хантны игисине,
Тюшмем адам тепсисине.
Дагъыда, ой, айналайым,
Бир зат айтыб къутулайым.
Гугурукдан туугъан Хораз
Менге къолай устаз болмаз.
Аны болса да хан аты,
Кёкде тутмазды къанаты.
Ханга тергей эсе кесин,
Ол тюлкюге бир тюбесин
Халкъдан юркюб къачхан тюлкю
Анга берир джашау юлгю.
Ёмюрледен да мен билиб,
Аскер бёлекча тизилиб,
Джюрюселе да бабушла,
Сюрюу бла учмайла къушла.
Кёзюу джетгинчи бошаргъа,
Бир зат излейме къошаргъа:
Багуш тюбде джатса тюзлюк,
Неге джарайды кёбчюлюк.?