Полное Богородичное правило

Пресвятая Богородице, помогай нам! В начале сего правила читается:Отче наш… 1 раз.Милосердия двери… 1 раз.Молитва за духовного отца и о спасении…
После 1-го десятка вспоминается Рождество Богородицы
Тропарь, гл. 4
Рождество Твое, Богородице Дево, радость возвести всей Вселенней: из Тебе бо возсия Солнце Правды, Христос Бог наш, и, разрушив клятву, даде благословение, и упразднив смерть, дарова нам живот вечный.
О Пресвятая Владычице Богородице! Со святыми упокой в вечной славе Твоей душу усопшего отца нашего духовного старца схиигумена Саввы с усопшими духовными чады и родителей его Михаила и Екатерины и сродников наших.
И святыми его молитвами спаси и сохрани всех нас, духовных чад его, родителей, чад сродников и знаемых наших. Умножь в нас веру и покаяние.
После 2-го десятка вспоминается Введение во храм Пресвятой Девы Богородицы
Тропарь, гл. 4
Днесь благоволения Божия предображение и человеков спасения проповедание: в храме Божии ясно Дева является и Христа всем предвозвещает. Той и мы велегласно возопим: радуйся, смотрения Зиждителева исполнение.
О Пресвятая Владычице Богородице! Спаси и сохрани, и соедини (или присоедини) к святей Православной Церкви заблудших и отпавших рабов ( имена).
После 3-го десятка вспоминается благовещение Пресвятой Богородицы
Тропарь, гл. 4
Днесь спасения нашего главизна и еже от века таинства явление, Сын Божий Сын Девы бывает и Гавриил благодать благовествует.
Темже и мы с ним Богородице возопиим: радуйся, Благодатная, Господь с Тобою!
О Пресвятая Владычице Богородице! Утоли наши скорби и пошли утешение скорбящим и болящим рабом Твоим ( имена).
Евангелие от Луки 1, 2 6-3 8:
«В месяц же шестый послан бысть ангел Гавриил от Бога во град Галилейский, емуже имя Назарет, к Деве, обрученней мужеве, емуже имя Иосиф, от дому Давидова: и имя Деве Мариам. И вшед к Ней ангел рече: «Радуйся, Благодатная, Господь с Тобою: Благословенна Ты в женах». Она же видеши, смутися о словеси его и помышляше, каково будет целование сие. И рече ангел Ей: «Не бойся, Мариам: обрела бо еси благодать у Бога: и се, зачнеши во чреве и родиши Сына и наречеши имя Ему Иисус: Сей будет велий и Сын Вышняго наречется: и даст Ему Господь Бог престол Давида, отца Его: и воцарится в дому Иаковли во веки, и Царствию Его не будет конца». Рече же Мариам ко ангелу: «Како будет сие, идеже мужа не знаю?» И отвещав, ангел рече Ей: «Дух Святый найдет на Тя, и сила Вышняго осенит Тя: темже и раждаемое Свято наречется Сын Божий: и се, Елисавет, южика Твоя, и та зачат сына в старости своей; и сей месяц шестый есть ей, нарицаемой неплоды: яко не изнеможет у Бога всяк глагол». Рече же Мариам: «Се, раба Господня: буди Мне по глаголу твоему». И отыде от Нея ангел».
После 4-го десятка вспоминается встреча Пресвятой Богородицы с праведной Елисаветой
Из службы пророка Захарии и праведной Елисаветы, память 5 сентября.
Седален, гл. 4
Воплотившуся уже Мессии первую тя благовестницу слышим, егда к целовавшей тя Богоизбранней Отроковице со ужасом глаголала еси: «Откуда мне сие, да прииде Мати Господа моего ко мне?» Восхваляюще убо тя вопием: «Радуйся, зерцало, Тайны Божия нам являющая».
Молимся о соединении разлученных, у кого близкие или дети в разлуке или пропали без вести.
После 5-го десятка вспоминается Рождество Христово
Тропарь, гл. 4
Рождество Твое, Христе Боже наш, возсия мирови свет разума; в Нем бо звездам служащий звездою учахуся Тебе кланятися, Солнцу Правды, и Тебе ведети с высоты Востока: Господи, слава Тебе!
О Пресвятая Владычице Богородице! Даруй нам во Христа облещись.
После 6-го десятка вспоминается Сретение Господне и прореченное святым Симеоном слово: «И Тебе Самой душу пройдет оружие»
Тропарь, гл. 1
Радуйся, Благодатная Богородице Дево, из Тебе бо возсия Солнце Правды, Христос Бог наш, просвещали сущия во тьме; веселися и ты, старче праведный, приемый во объятия Свободителя душ наших, дарующаго нам воскресение.
О Пресвятая Владычице Богородице! Сподоби мя при последнем издыхании причаститися Святых Тайн Христовых и Сама проведи душу мою чрез страшные мытарства.
После 7-го десятка вспоминается бегство Божией Матери с Богомладенцем в Египет
Се ангел Господень во сне явися Иосифу, глаголя: «Востав, поими Отроча и Матерь Его и бежи во Египет, и буди тамо, дондеже реку ти: хощет бо Ирод искати Отрочате, да погубит Е». Бог явися в сени седящим, от Девы родивыйся во еже спасти нас.
О Пресвятая Владычице Богородице! Не введи мя во искушение в сей жизни и избави мя от всех напастей.
После 8-го десятка вспоминается исчезновение 12-летнего Отрока Иисуса в Иерусалиме и скорбь Божией Матери по этому поводу
О Мати наша Прекрасная!
Соболезнующи скорбь Твою, егда Сына Твоего и Бога нашего, двоюнадесятилетняго Отрока, на пути из Иерусалима не обретше. О велия радость Твоя, егда Сына Твоего по триех днех в церкви обрела еси.
О Цвете неувядаемый! Не лиши и нас небесной радости узрети Сына Твоего, Господа нашего Иисуса Христа, для спасения нашего.
О Пресвятая Владычице Богородице! Даруй мне непрестанную молитву Иисусову.
После 9-го десятка вспоминается чудо, сотворенное в Кане Галилейской, когда Господь претворил в вино воду по слову Божией Матери: «Вина нет у них»
Из Триоди, еже есть трипеснец, в Великий Пяток утра
Икос, глас 8
Своего Агнца Агнице зряше, к заколению влекома, последовавше Мария простертыми власы со иными женами, сия вопияше: «Камо идеши, Чадо? Чесо ради скорое течение совершаеши, егда другий брак паки есть в Кане Галилейстей и тамо ныне тщишися, да от воды им вино сотвориши? Иду ли с Тобою, Чадо, или паче пожду Тебе? Даждь Ми слово, Слове, не молча мимоиде Мене, Чисту соблюдый Мя: Ты бо еси Сын и Бог Мой».
О Пресвятая Владычице Богородице! Помоги мне во всех делах моих и избави от всяких нужд и печали.
После 10-го десятка вспоминается стояние Божией Матери у Креста Господня, когда скорбь, как оружие, пронзила Ее душу
Богородичны отпустительныя, гл. 4
Дево Пренепорочная, Мати Христа Бога!
Оружие пройде Твою Пресвятую душу, егда распинаема видела еси волею Сына и Бога Твоего. Егоже, Благословенная, молящи не престай, прощение прегрешений нам даровати.
О Пресвятая Владычице Богородице! Избави меня от уныния и укрепи мои силы душевныя и телесныя.
После 11-го десятка вспоминается Воскресение Христово
Тропарь, гл. 5
Христос воскресе из мертвых, смертию смерть поправ и сущим во гробех живот даровав.
О Пресвятая Владычице Богородице! Воскреси душу мою и даруй мне постоянную готовность к подвигу.
После 12-го десятка вспоминается Вознесение Христово, при котором присутствовала Божия Матерь
Тропарь, гл. 4
Вознеслся еси во славе, Христе Боже наш, радость сотворивый учеником обетованием Святаго Духа извещенным им бывшим благословением, яко Ты еси Сын Божий, Избавитель мира.
О Пресвятая Владычице Богородице! Избави мя от помышлений суетных и даруй мне ум и сердце, стремящееся ко спасению души.
После 13-го десятка вспоминается сионская горница и сошествие Святаго Духа на апостолов и Божию Матерь
Тропарь, гл. 8
Благословен еси, Христе Боже наш, Иже премудры ловцы явлей, ниспослав им Духа Святаго, и теми уловлей вселенную, Человеколюбче, слава Тебе.
Молимся: сердце чисто созижди во мне, Боже, и дух прав обнови во утробе моей. Не отвержи мене от лица Твоего и Духа Твоего Святаго не отыми от мене.
После 14-го десятка вспоминается Успение Пресвятой Богородицы
Тропарь, гл. 1
В рождестве девство сохранила еси, во успении мира не оставила еси, Богородице, преставилася еси к животу, Мати сущи Живота, и молитвами Твоими избавляеши от смерти души наша.
О Пресвятая Владычице Богородице! Даруй мне мирную и безмятежную кончину.
После 15-го десятка вспоминается слава Божией Матери, которой Она увенчивается Господом после переселения Ее от земли на небо
Из службы Успению Пресвятыя Богородицы
Стихира, гл. 1
О дивное Чудо! Источник жизни во гробе полагается, и лествица к небеси гроб бывает. Веселися, Гефсимание, Богородичен святый доме! Возопиим, вернии, Гавриила имуще чиноначальника: Благодатная, радуйся, с Тобою Господь, подаяй мирови Тобою велию милость.
О Пресвятая Владычице Богородице! Сохрани мя от всякого зла и покрый мя честным Твоим омофором.
Молитва
Достойно славимая и праведно от всех Горних Чинов ублажаемая, яко без сравнения их превосходящая, Бога и Творца всяческих рождшая, паче всех возвеличенная! Ей же, яко Царице, предстоят лица ангельстии, Гавриилову песнь возглашающие: «Радуйся, Благодатная!…»
Наши же грешные и бренные уста кую достойную похвалу принести возмогут величию Твоему, точию да зовем Ти: О Пречудная Владычице! Молися из Тебе воплощенному Христу Богу нашему, да призрит на ны, люди безответныя, да сохранит невредимы от всех навет вражиих и злых клевет, много бо может Твоя Матерняя молитва, по реченному: «Проси, Мати Моя, не отвращуся, но вся прошения Твоя исполню!» Радостию о сем исполняемии, взываем Ти: спаси, Владычице, погибающия рабы Твоя, просвети омраченныя суемудрствованиями века сего и приведи ны к Сладчайшему Иисусу, да вечно радующеся, взываем: слава Отцу, слава Сыну, слава Святому Духу, слава и Тебе, Преславней и Пренепорочней Деве Богоматере, ублажаемой и благословляемой в безконечные веки веков. Аминь.
Радуйся, Радосте наша, покрый нас от всякого зла честным Твоим омофором!
В 30 км от Москвы, в Домодедовском районе, находился известный в ХХ веке Серафимо-Знаменский скит. В истории Русской Православной Церкви он знаменит высотою монашеской жизни его устроителей, впоследствии новомучеников и исповедников российских.
Закладка скита состоялась 9 августа 1910 года, 23 сентября 1912 года митрополит Владимир (Богоявленский), в последствии священномученик, освятил новосозданную обитель. Нива духовного окормления скита была уготована епископу Арсению (Жадановскому), священнослужителю в пятом поколении, одному из сонма новомучеников последнего времени, человеку высокой духовности, мудрости и чистоты. Со дня основания и до закрытия в 1924 году Серафимо-Знаменский скит был местом его уединенных подвигов. В 1916 году он становится духовником обители.
Обладая большим духовным опытом и прекрасным литературным даром, он оставил потомкам мемуары о великих подвижниках XX столетия – книгу «Воспоминания», ряд статей по истории Русской Церкви и богослужебных текстов, в том числе служба с акафистом Пресвятой Богородице в честь Ее иконы «Покрывающая».
Основательницей скита считается схиигумения Фамарья, которая получила благословение на его строительство от великих церковных старцев того времени: Гавриила Седмиезерского, Анатолия Оптинского и Алексея Зосимовского. Неоценимую помощь в создании скита, решении вопросов по его внешнему и внутреннему устройству оказала Романова Елизавета Федоровна – великая русская княгиня, преподобномученница, которая была духовным другом матушки Фамарьи.
Вскоре после закладки скита – 23 августа 1912 года – новая обитель была освящена Московским митрополитом, позже – священномученником, Владимиром Богоявленским.
Чудотворный образ Богородицы – икона Покрывающая, или как ее еще называют – Домодедовская (по географическому месторасположению) – был тайным (келейным) грузинским образом схиигумении Фамарьи.
Существует предположение, что в основу образа легла картина Пьера Миньяра «Мадонна с виноградом».
На этой иконе Божией Матери, по описанию духовника обители священномученика епископа Арсения (Жадановского): «Божия Матерь головным платком прикрывает и как бы от кого защищает Богомладенца, а Он держит в руке кисть винограда – эмблему Святого Причащения, при котором не страшны никакие невзгоды...»
Образ Божией Матери «Покрывающая» матушка Фамарь считала хранителем и покровителем скита и его насельниц, напоминающим им о необходимости частого причащения святых Христовых Тайн. Вместе с сестрами в чувстве благодарности и умиления она воспевала Преблагословенной: "Ты, Всеблагая Мати, дивно крат верных рабов Твоих сохраняеши и от наветов злых духов и человеков незримо покрываеши..."
Второе название – Домодедовская – икона Божией Матери получила по месту расположения скита.
После кончины схиигумении Фамари и духовных чад епископа Арсения (Жадановского) икона была передана в Новоспасский мужской монастырь г. Москвы. Особо почитаемая икона в скиту и ныне, где читается посвященный ей акафист.
Местночтимое празднование иконы Богородицы «ПОКРЫВАЮЩАЯ» (ДОМОДЕДОВСКАЯ) приурочено к 19 марта (по новому стилю) – дню рождения владыки Арсения.
Кондак 1
Взбранней Воеводе Царице небесе и земли, даровавшей нам пречудную икону «Покрывающая», благодарственное приносим пение. Ты же, яко Благосердая Мати, не отрини нашего сего моления, но благоволи прияти е, сподобив вопити Тебе тако:
Радуйся, Владычице мира, от наветов злых духов и человеков нас покрывающая.
Икос 1
Ангельский глас услыша святая Анна извествующ: «Ты зачнеши и родиши Дщерь, Преблагословенную Марию; в Ней благословятся вся племена земная и приидет спасение всему миру». Сие ведуще возопием Богородице:
Радуйся, Мати Сына Божия.
Радуйся, Пренепорочная Дево.
Радуйся, Спаса душ наших родившая.
Радуйся, грешных с Богом примирившая.
Радуйся, Невместимаго вместилище.
Радуйся, носило всего Божества.
Радуйся, Божие к смертным благоволение.
Радуйся, смертных к Богу дерзновение.
Радуйся, честнейшая Херувим.
Радуйся, славнейшая без сравнения Серафим.
Радуйся, ада и смерти попрание.
Радуйся, вечныя жизни дарование.
Радуйся, Владычице мира, от наветов злых духов и человеков нас покрывающая.
Кондак 2
Видяще святыя Твоя родителие Иоаким и Анна, яко Ты еси, Пречистая, плод Благословенный, возблагодариша Бога и пред дверьми храма положиша обет посвятити Тя Господу, поя Ему: Аллилуиа.
Икос 2
Разум совершенный Ты Сама стяжала еси, Богородице, воспитавшися во Святая Святых, тако не престаеши умудряти и просвещати светом богоразумия и вся христианы, вопиющия Ти таковая:
Радуйся, к Богопознанию приводящая.
Радуйся, к свету истины прельщенныя обращающая.
Радуйся, страх Божий в сердца вселяющая.
Радуйся, благоговети пред святынею научающая.
Радуйся, ревностию ко спасению воодушевляющая.
Радуйся, духовное нечувствие в нас подавляющая.
Радуйся, храмы Божия почитати внушающая.
Радуйся, в них отраду находити вдохновляющая.
Радуйся, жажду Святаго Причащения возбуждающая.
Радуйся, веру и любовь к Богу воспламеняющая.
Радуйся, чистоты и целомудрия Поборнице.
Радуйся, добрыя христианския жизни Споспешнице.
Радуйся, Владычице мира, от наветов злых духов и человеков нас покрывающая.
Кондак 3
Сила Вышняго осени Тя, Благодатная, егда Архангел Гавриил благовествоваше Ти о безсеменном зачатии Сына Божия, Спасителя миру. Прияв сию благую весть со смирением, яко раба Господня, возопила еси Богу: Аллилуиа.
Икос 3
Имуще во утробе Христа Жизнодавца, востекла еси, Благословенная, к южике Своей, праведней Елисавете, и целовастася обе матери, радуяся о Бозе Спасе нашем. Сего ради, яко источнику святыя радости, вопием Ти сице:
Радуйся, тяжкое житие наше облегчающая.
Радуйся, лютыя беды и напасти отгоняющая.
Радуйся, от душевныя туги и уныния спасающая.
Радуйся, безпомощным на помощь ускоряющая.
Радуйся, испытания Божия за благо приимати указующая.
Радуйся, в самих страданиях утешение подающая.
Радуйся, яко Тобою злыя начинания пресекаются.
Радуйся, яко тобою добрая желания наша исполняются.
Радуйся, огнем матерния Твоея любве души согревающая.
Радуйся, благодатию Святаго Духа нас озаряющая.
Радуйся, всех скорбящих и угнетенных Мати Благосердая.
Радуйся, всего мира христианского Заступнице усердная.
Радуйся, Владычице мира, от наветов злых духов и человеков нас покрывающая.
Кондак 4
Буря недоумения смущает ми ум, како возмогу недостойными усты восхвалити Тя, Пресвятая Дево, за Твое великое нам вспоможение. Темже, величая неисчетныя Твоя милости, смиренномудренно пою Вседержителю Богу: Аллилуиа.
Икос 4
Слышаша Вифлеемстии пастырие Ангелов, поющих Христово Рождество, текше в пещеру, обретоша тамо Богородительницу, на руках держащую Превечнаго Младенца. С ними в веселии духовнем и мы Тебе, яко общей Матери, глаголем тако:
Радуйся, младенцев воспитание.
Радуйся, отроком смысла Подательнице.
Радуйся, юношей Руководительнице.
Радуйся, добрых дев величание.
Радуйся, возрастных и мужей премудростию обогащающая.
Радуйся, жен стыдением и кротостию наделяющая.
Радуйся, старцев благоговейных сладкое успокоение.
Радуйся, стариц боголюбивых тихое прибежище.
Радуйся, честных браков устроение.
Радуйся, вражды и ссоры между единокровными разрушение.
Радуйся, благочестивых семейств благословение.
Радуйся, девства похвало и возвышение.
Радуйся, Владычице мира, от наветов злых духов и человеков нас покрывающая.
Кондак 5
Боготечною звездою являешися, Царице Небесная, всем под покров Твой всемощный прибегающим и непрестанно в умилении сердечнем вопиющим к Богу: Аллилуиа.
Икос 5
Видя праведный Симеон Тя, пришедшую с Младенцем Иисусом во храме представитися Господеви, рече: «Тебе же Самой душу пройдет оружие», проразумевая матерния Твоя страдания о Сыне Твоем Божественнем и о всех гонимых за имя Его святое. Сего ради зовем Ти:
Радуйся, пастырей Церкви от мира поносимых прославление.
Радуйся, рабов Божиих осмеиваемых ободрение.
Радуйся, стоящих за правду защищение.
Радуйся, томимых горькими работами облегчение.
Радуйся, яко невинно осужденных свобождаеши.
Радуйся, яко из изгнания скоро возвращаеши.
Радуйся, во узах седящих благодатно посещающая.
Радуйся, терпеливых страдальцев предвкушением блаженства услаждающая.
Радуйся, сердца злых людей, враждующих противу нас, смягчающая.
Радуйся, советы лукавыя и коварство их разоряющая.
Радуйся, от разбойников на пути ны охраняющая.
Радуйся, татей и тайных убийц от домов наших отводящая.
Радуйся, Владычице мира, от наветов злых духов и человеков нас покрывающая.
Кондак 6
Проповедницы Твоея благодатныя помощи суть все множество Тобою спасенных: страждущих, болящих, скорбящих и грехми обремененных, благодарственно о Тебе поющих Богу: Аллилуиа.
Икос 6
Возсия Божественный свет во Египте и падоша тамо идоли, егда бежала еси, Пречистая, с Богомладенцем Иисусом, спасаяся от убийства Иродова. Ты убо озаряеши светом Боговидения умы и всех удаляющихся прелестей суетнаго мира, исторгая из душ их кумиры гнездящихся тамо губительных страстей. Темже превозносим Тя словесы сими:
Радуйся, сумнящихся в вере вразумление.
Радуйся, гордых умом своим смирение.
Радуйся, озлобленных и гневом палимых укрощение.
Радуйся, ропщущих на Промысл Божий с тяготами жизни примирение.
Радуйся, яко дерзких ругателей Бога и Святыни Его незримо караеши.
Радуйся, яко заблуждших на путь спасения наставляеши.
Радуйся, суеверных и гадателей посрамление.
Радуйся, развращенных и нечестивых обличение.
Радуйся, яко душевредная учения низлагаеши.
Радуйся, яко истину познавати помогаеши.
Радуйся, яко мрак хулы, срамословия и всякия лжи разсеяваеши.
Радуйся, светом святаго Евангелия люди просвещаеши.
Радуйся, Владычице мира, от наветов злых духов и человеков нас покрывающая.
Кондак 7
Хотящи николиже отлучатися от рожденнаго Тобою Спасителя мира, Ты, Богоблаженная, пребывала еси с Ним неотлучно во граде Назарете, детоводя и питая Его яко человека, и поя в сердце Своем, яко Богу: Аллилуиа.
Икос 7
Новую показуя матернюю любовь к Сыну Твоему, со скорбию искала еси Его, двоюнадесятилетняго отрока, во граде Иерусалиме в праздник Пасхи, мняще Его в дружине суща. Ведуще таковое Твое сердоболие, со умилением вопием Ти:
Радуйся, обидимых и огорченных возвышающая.
Радуйся, ненавидимых и всеми отверженных честию величающая.
Радуйся, убогих и нагих одеяние.
Радуйся, нищих и разоренных питание.
Радуйся, бездомных, странных, вдов и сирот призрение.
Радуйся, неимущим работы поможение.
Радуйся, путешествующим благополучное к дому возвращение.
Радуйся, заблуждших в пути к жилищу приведение.
Радуйся, детям неудобоучащимся разум обновляющая.
Радуйся, умом и нравом простых Своею помощью не оставляющая.
Радуйся, ненадежных надеяние.
Радуйся, уповающих на волю Божию наслаждение.
Радуйся, Владычице мира, от наветов злых духов и человеков нас покрывающая.
Кондак 8
Странное и предивное Твое попечение бысть о христианех на всех путех их жизни многомятежней и многотрудней. Сего ради, имея в Тебе толико Милосердую и независтную Помощницу, вси облагодетельствованнии Тобою велегласно поют Богу: Аллилуиа.
Икос 8
Вся была еси со Христом при служении Его роду человеческому, како и божественный евангелист Лука повествует о Тебе, глаголя: «Мати Твоя и братия вне стоят видети Тя хотяще». Мним, яко Ты, Всеблагая Мати, неотступно пребываеши и со всеми труждающимися во славу Божию, восхваляющими Тя тако:
Радуйся, правителей, яко слуг Божиих, поставляющая.
Радуйся, сущих во власти к торжеству добра направляющая.
Радуйся, святителей правилом веры и образом благочестия украшающая.
Радуйся, пастырей ревностию о спасении чад духовных снабдевающая.
Радуйся, наставников совершенный разуме.
Радуйся, учащихся в науках преуспеяние.
Радуйся, вождей и воинов к защите веры и отечества побуждающая.
Радуйся, инокам и инокиням в борьбе с прилогами мира и плоти пособляющая.
Радуйся, судей святое зерцало правды.
Радуйся, врачей искусное больных врачевание.
Радуйся, земледельцев Соработнице и Благая Помощнице.
Радуйся, всех честне трудящихся покой и надежное пристанище.
Радуйся, Владычице мира, от наветов злых духов и человеков нас покрывающая.
Кондак 9
Всяк возраст верных благопользуется Твоим попечением, Всемилостивая Мати, яко всегда к Тебе прибегающим душеполезное даруеши, потребная в житии доставляеши и усердно ходатайствуеши за ны, немощныя и грешныя, у Престола Господа Славы, Емуже поем: Аллилуиа.
Икос 9
Ветия многовещанныя не могут изглаголати Твоея матерния печали, при Кресте Сына Твоего бывшей, егда видела еси Его страждуща за вся человеки мукою неизглаголанною. Темже, яко искушенней по всяческим и сострадати в самых тяжких скорбях и лишениях нам могущей, взываем Ти:
Радуйся, слепых прозрение.
Радуйся, глухих слышание.
Радуйся, хромых хождение.
Радуйся, раслабленных телом исцеление.
Радуйся, недужных здравие.
Радуйся, в злоключения впадших земныя суеты познание.
Радуйся, стужаемых от бесов избавление.
Радуйся, поврежденных умом просветление.
Радуйся, неисцельно больных на Свои всемощныя руце приемлющая.
Радуйся, от злых навыков, опивства, брани и игралищ изъемлющая.
Радуйся, отчаянных грешников моления не отвергающая.
Радуйся, от пагубнаго безволия их исхищающая.
Радуйся, Владычице мира, от наветов злых духов и человеков нас покрывающая.
Кондак 10
Спасти хотя мир, Иже всех Господь, сый на Кресте, дарова всему миру Пресвятую, Премилосердную Матерь, егда изрек Пренепорочней и возлюбленному ученику: «Се сын Твой» и «Се Мати твоя». Благодаряще за сие Всеблагаго Бога, глаголем Ему: Аллилуиа.
Икос 10
Стена крепка явилася еси по завету Господа, Преблагословенная, даруя всем благоденствие, мир, отраду и радость, яко и Сама все сие первая получила еси от Воскресшаго Христа Спасителя, услышав от Него приветственный глас: «Радуйся!». Сего ради ублажаем Тя тако:
Радуйся, всякую ненависть, злобу и вражду в нас укрощающая.
Радуйся, мир о Дусе Святе в сердце вселяющая.
Радуйся, зависть, клевету, ревность и злопамятство истребляющая.
Радуйся, братолюбием нас ущедряющая.
Радуйся, от глада, хлада, труса, потопа, огня и меча ограждающая.
Радуйся, хлебом насущным нас питающая.
Радуйся, смертоносную язву прекращающая.
Радуйся, гнев Божий праведно на ны движимый, утоляющая.
Радуйся, праведных дел наших поспешение.
Радуйся, на всех путех жизни нашея промышление.
Радуйся, родителей благонравием детей утешающая.
Радуйся, рабов Божиих тихим и безмолвным житием награждающая.
Радуйся, Владычице мира, от наветов злых духов и человеков нас покрывающая.
Кондак 11
Пение наше смиренное, от полноты любве и усердия Тебе приносимое, не презри, Богоневесто, и не отвратися от нас, грешных и недостойных, но помози нам очиститися от всякия скверны плоти и духа, да возможем достойно и праведно пети Богу: Аллилуиа.
Икос 11
Светом руководствующим являлася еси Апостолом, Богородительнице, по вознесении Сына Твоего на небо. Таковою пребываеши даже до сего дне всем хотящим спаститися и в разум истины приити. Не лиши, о Всеблагая, Твоего святаго водительства и нас, в житейском море треволнений обуреваемых, обаче от сердца приносящих Тебе благохваления таковая:
Радуйся, нечистыя помыслы пожигающая.
Радуйся, от греховных чувств отрезвляющая.
Радуйся, искушения и соблазны от нас прогоняющая.
Радуйся, к покаянию и исправлению подвизающая.
Радуйся, слезами сокрушения бездну беззаконий наших омывающая.
Радуйся, духовно бодрствовати нам помогающая.
Радуйся, ум и сердце к горнему возводящая.
Радуйся, все земное презирати понуждающая.
Радуйся, к трезвению и молитве приводящая.
Радуйся, блаженство духа тем уготовляющая.
Радуйся, подвижников благочестия явное подкрепление.
Радуйся, всех верных дивное спасение.
Радуйся, Владычице мира, от наветов злых духов и человеков нас покрывающая.
Кондак 12
Благодать Божественную испроси нам у Сына Твоего и Бога, простри руку помощи, да не погибнем во гресех и лютых обстояниях, находящих на ны от враг видимых и невидимых, умиротвори наша сердца, злобою и враждою исполненныя, да утешеннии Тобою, радостно зовем Богу: Аллилуиа.
Икос 12
Поюще честное Твое Успение, прославляем и Покров Твой святый, распростертый над всем миром, наипаче же родом христианским, прославляющим Тя тако:
Радуйся, покаянием к исходу от сея жизни нас приуготовляющая.
Радуйся, болезньми от грехов очищающая.
Радуйся, яко от напрасныя смерти сохраняеши.
Радуйся, яко последняго напутствия достойныя сподобляеши.
Радуйся, скорое разрешение души от тела в предсмертных муках посылающая.
Радуйся, мирную кончину дарующая.
Радуйся, горьких мытарств избавляющая.
Радуйся, христианского погребения не лишающая.
Радуйся, ко Господу выну о нас предстательствующая.
Радуйся, в жизни и по смерти с нами пребывающая.
Радуйся, страха смертнаго нас избавляющая.
Радуйся, Радосте наша, двери райския нам отверзающая.
Радуйся, Владычице мира, от наветов злых духов и человеков нас покрывающая.
Кондак 13
О Владычице мира, приими сие малое благодарение наше, от всего сердца Тебе приносимое, и не попусти нам николиже охладевати в сем благодарном чувстве, но вразуми нас всегда помнити Твоя неисчестныя милости и со слезами умиления вопити о Тебе Богу: Аллилуиа.
(Этот кондак читается трижды, затем икос 1 и кондак 1)
Молитва
О Пресвятая Дево Богородице, Премилостивая Мати всех христиан, наипаче же скорбящих, гонимых и многоразличными недугами одержимых! Аз, яко нищ и убог душею и телом, представ пред святым Твоим образом, со слезами умильно прошу Твоего благодатнаго подаяния, ничто бо доброе и благое во мне есть, весь обложен немощами, нищетою и убожеством: нозе мои не обувени, дабы поспешати ми на дела святыя и богоугодныя, руце мои загрязнены от множества содеянных мною беззаконий, очи мои потуплены от нечистыя совести, зане не возмогут взирати на благолепие красоты Твоея, явленныя нам в чудотворном Твоем образе «Покрывающая». Все лице мое потемнено и испещрено печатию безчисленных моих пороков и грехопадений. Несть во мне ни спасительныя веры, ни утешительныя надежды, ни благостныя любве. Аз есмь яко гнилостный сосуд, преисполненный всякия скверны: гордости, себялюбия, высокоумия, тщеславия, гнева, раздражительности, злобы, памятозлобия, недоброжелательства, зависти, ревности, осуждения, ропота, злословия, празднословия, лукавства, лести, обмана, лицемерия, уныния, нетерпения, малодушия, невоздержания душевных и телесных чувств, пристрастия, плотоугодия, всякаго сладострастия и иных тмочисленных страстей. И каково мое убожество духовное, таково же и телесное: болезни и напасти обдержаша мя и все житие мое, яко трость ветром колеблема, исполнено непостоянства, страха и всякия опасности. По глаголу святаго Апостола: беды от духов злобы поднебесных, беды от ненавидящих, обидящих и враждующих противу меня человеков, беды от зверей, скотов и гадов земных, беды от стихий мира – молнии, огня, воды, тлетворнаго воздуха, хлада, глада, беды от многих немощей и болезней моего тела, беды на пути и в дому, беды во дни и в нощи. Кто же мя поддержит, кто сохранит, кто от врагов избавит, кто к добродетели направит, кто болезни моя исцелит, кто утешит, упокоит, вразумит, наставит, спасет и помилует, аще не Ты, Пресвятая Мати, Заступница и Покровительница моя Всеблагая? Ты разсеянный по миру ум мой собери, помыслы от всякия скверны очисти, чувства, отравленныя всяким злом, освежи, волю мою, дряблую на все доброе, укрепи и от пагубнаго безволия мя избави, сердце от страстей свободи и святою любовию к Богу и ближним наполни, всю внутреннюю храмину мою переустрой и удобным жилищем Духа Святаго соделай. Не остави мя, Премилосердая Владычице, и в телеснем моем многоскорбнем житии: болезни потреби, враги видимыя и невидимыя разжени, злыя обстояния разруши, страх, приходящий от духов злобы и человеков, хотящих мя погубити, отжени, вся потребная и нужная ми даруй, бодрость духа пошли. Да обновленный, да очищенный, да утешенный Тобою, Царице моя Пресвятая, прославлю Святую Троицу: Отца и Сына и Святаго Духа и Твое дивное о мне попечение ныне и присно и во веки веков. Аминь.
Тропарь, глас 4
К Богородице притецем, сущии в бедах, и святей иконе Ея тако возопием: О Владычице мира, приими непрестанное и усердное благодарение наше, яко во дни лютых обстояний Ты, Всеблагая Мати, дивно верных раб Твоих сохраняеши и от наветов злых духов и человеков незримо покрываеши.
Кондак, глас 6
Не имамы иныя помощи, не имамы иныя надежды, разве тебе, Владычице, Ты нам помози, на Тебе надеемся и Тобою хвалимся, Твои бо есмы раби, да не постыдимся.