Патрабуем спыніць рэпрэсіі і правакацыі!
Заява кампаніі «Права Выбару» з нагоды затрымання блогера Сяргея Ціханоўскі, а таксама іншых членаў ініцыятыўных груп прэтэндэнтаў на пасаду прэзідэнта Рэспублікі Беларусь.
29 мая ў Гродне на пікеце па зборы подпісаў у падтрымку прэтэндэнта на пасаду прэзідэнта Беларусі Святланы Ціханоўскай затрымалі яе мужа, кіраўніка яе ініцыятыўнай групы, блогера Сяргея Ціханоўскага. 30 і 31 траўня былі затрыманыя таксама Мікалай Статкевіч і іншыя члены ініцыятыўных груп прэтэндэнтаў на пасаду прэзідэнта Беларусі.
Пікет, на якім затрымалі Сяргея, быў законным і мірным. Затрыманне Сяргея Ціханоўскага, а таксама іншых членаў ініцыятыўных груп прэтэндэнтаў на пасаду прэзідэнта Рэспублікі Беларусь з'яўляецца грубым парушэннем канстытуцыйных правоў удзельнічаць у выбарчай кампаніі, ціскам на каманды незалежных прэтэндэнтаў у кандыдаты ў прэзідэнты Беларусі.
Мы асабліва падкрэсліваем той факт, што з-за папярэдняга адміністрацыйнага арышту Сяргей Ціханоўскі быў пазбаўлены магчымасці рэалізацыі свайго законнага права зарэгістраваць сваю ініцыятыўную групу для вылучэння кандыдатам у прэзідэнты.
Бесперапынны ціск на сяброў ініцыятыўных груп падчас збору подпісаў зʼяўляецца найгрубейшым парушэннем права на свабодныя справядлівыя выбары ў Рэспубліцы Беларусь, кампраметуе нашу краіну ў вачах міжнароднай супольнасці і пазбаўляе народ Беларусі права абіраць уладу.
Мы патрабуем неадкладнага вызваліць Сяргея Ціханоўскага і іншых затрыманых па гэтай справе. Патрабуем пакараць усіх вінаватых у арганізацыі правакацыі, скіраванай супраць Сяргея і яго каманды 29 мая ў Гродне. Мы патрабуем вызваліць усіх затрыманых сябраў усіх каманд прэтэндэнтаў. Мы патрабуем спыніць вал рэпрэсій і правакацый. Мы патрабуем забяспечыць законнасць і роўныя магчымасці для правядзення выбарчай кампаніі ўсіх прэтэндэнтаў на пасаду прэзідэнта Беларусі.
Заклікаем грамадзян Беларусі падтрымаць патрабаванне вызваліць Сяргея Ціханоўскага і ўсіх неабгрунтавана затрыманых сяброў ініцыятыўных груп і грамадзян, якія прынялі ўдзел у перадвыбарчай кампаніі. https://forms.gle/nDJ8vJHWGeZ4gBEK7 #pvby #ПраваВыбару
Присоединяйтесь к ОК, чтобы подписаться на группу и комментировать публикации.
Нет комментариев