Сентябрь 26-ӧд лунӧ чолӧмалам 85 арлыд тыран пасӧн пыдди пуктана, Помӧсдін школаын вӧвлӧм велӧдысь, Уляшева Янина Ивановнаӧс.

Янина Ивановнаӧс бура тӧдӧ сиктса быд олысь. 40 во сійӧ велӧдіс школаын медычӧт арлыда челядьӧс. Быдтор вылӧ тай сям сетлӧма Енмыс тайӧ мелі нюмбана аньыслы. Школа урокъяс кындзи, Янина Ивановна нуӧдіс гудӧк вылын ворсан кружок, матӧ 40 морт петісны сылӧн кипомысь гудӧкӧн ворсысьясӧн. Нӧшта и мандолина вылын да паньяс вылын (ложкарьяс) сяммис велӧдны ичӧт войтырӧс. Пенсия вылӧ петӧм бӧрын Янина Ивановна эз кут прӧстӧ шойччыны: уна во ветлӧдліс клубӧ, сьылан котырӧ, да и гудӧкасьысь нывбабаыд быдлаӧ ковліс. Велӧдысьлысь кужӧмлунсӧ пасйывлісны не сӧмын Республика тшупӧдын, но и Россия просвещение министерство пыр. Мича шкатулка пытшкын Янина Ивановна видзӧ уджӧн шедӧдӧм ыджыд паса наградаяс: «Знак Почета» орден, «За доблестный труд» юбилейнӧй медаль, «Ветеран труда» медаль. 1984 воын Янина Ивановналы РСФСР-са Министерство просвещения сетӧма почёт ним «Старший учитель» (Ӧні ногӧн кӧ «Заслуженнӧй учитель»). И збыль, Янина Ивановна аслас олӧмӧн, аслас донъявны позьтӧм уджӧн заслужитіс татшӧм наградасӧ. А медыджыд награда Велӧдысьлы, дерт жӧ, вӧвлӧм велӧдчысьяслӧн да матыса йӧзлӧн пыдди пуктӧм. Талун Юбилярӧс чолӧмавны воисны челядь, сизим внук-внучка да 15 правнук, уджвывса ёртъяс да вӧвлӧм велӧдчысьяс.
Сиам Янина Ивановналы бур здоровье, сьӧлӧмын кыпыдлун да медматысаяслӧн кытшын помтӧм муслун.