Талун ыджыд вежа Успенье лунӧ ми чолӧмалам Сордйыв сиктын олысь Игнатова Антонина Николаевнаӧс 90 арлыд тыран гӧгрӧс пасӧн.

Антонина Николаевна чужлӧма да быдмӧма Пожӧгса Габсиктын, 5 чоя-вока семьяын, кӧн ачыс волі медыджыд.
Антонина Николаевналӧн висьталӧмысь:
«Ми быдмим 5 чоя-вока, ме медыджыд чой-вок пиын. Кор заводитчис война, батьӧс босьтісны война вылӧ. Мамлы, ыджыд мамлы да пӧчлы сюри став сьӧкыд уджыс. Мамкӧд вӧлі мунам вӧрӧ пес лӧсьӧдны, быд лун сажень пес пилитам да чукӧртам. Меным сизим-кӧкъямыс арӧс: увъя мамӧн пӧрӧдӧм пуяс, лым весала пуяс гӧгӧр. Бать локтіс вит во бӧрын, ранитчӧмӧн. Синмас осколокыс пырӧма вӧлі, бӧрти синыскӧд и петіс, ёна и мучитчис. Операция вӧчисны карын да син пӧлнас сэсся кувтӧдзыс и оліс. Уджаліс и продавечӧн, и колхозын председательӧн. 50 арӧсӧн кувсис мус висьӧмысь».
Антонина Николаевна Пожӧгын 7 класс помалӧм бӧрын пыравліс уджавны Пожӧг больнича амбулаторияӧ санитаркаӧ. Во да кӧкъямыс тӧлысь уджалӧм бӧрын кайис Помӧсдінӧ. Босьтісны банкӧ уджавны. Уджаліс бюджетнӧй группаын бухгалтерӧн. Банкын уджаліс Помӧсдін район быртӧдз 10 во. Сы бӧрын пенсия вылӧ петтӧдз нӧшта 20 во продавечаліс Помӧсдін сельпо магазинъясын. Уна ошкана бумага бур уджысь сетӧма. Пенсия вылӧ петӧм бӧрын нин Антонина Николаевна пырӧдчис общественнӧй олӧмӧ- сьыліс Помӧсдін ветеранъяслӧн хорын. Удж вывса ветеран. Верӧскӧд Игнатов Вениамин Сергеевичкӧд быдтісны 4 челядь. Верӧс важӧн кувсис. Антонина Николаевна олӧ верӧсӧн вӧчлӧм керкаын ӧтнас, Сордйылын. Челядь бура дӧзьӧритӧны мамӧс. 7 внук да 8 правнук волывлӧны гажӧдны олӧма аньӧс.
Юбиляршаӧс чолӧмалісны Кулӧмдін районса ветеранъяслӧн сӧвет да район администрация нимсянь Елена Александровна Сазанович, Помӧсдін администрациясянь Кочанова Наталья Николаевна, Помӧсдін ветеранъяслӧн сӧветӧн веськӧдлысь Карманова Нина Ивановна. Чолӧмалана козин вайисны и Помӧсдін сельпоын юрнуӧдысь Карманова Светлана Алексеевнасянь. Уна бурсиӧм вӧлі и корӧм гӧстьяссянь, челядь да внук-внучкасянь.
Сиам Антонина Никол
аевналы бур здоровье да дыр на овны-вывны.