Талун чолӧмалам война кадся тылын уджалысьӧс, Помӧсдінын олысь Игнатов Александр Васильевичӧс 95 арлыд тырӧмкӧд ыджыд тшупӧда пасӧн!

Александр Васильевич чужліс да быдмис Выльгорт сиктын. Тырмис бурпӧт сьӧкыд кад олӧмыс и сьӧд уджыс. Ичӧтсянь, муртса тырис 11 арӧс, отсасис нин ыджыджык чой-воклы быд вермана удж бергӧдны: вӧв-додь вылын пес вӧр петкӧдны, конюшняын пелькӧдчыны. А 17 арӧссянь верстьӧ мужичӧй радын вӧрын уджавны. 1970 восянь пенсия вылӧ петтӧдз матӧ кызь во сельпо улын кочегаритіс. Уна ошкана кыв уджвывса ёртъяссянь кывліс. Ставсӧ ӧнӧдз кутӧ тӧд вылын. Гӧтырыскӧд чужтісны да быдтісны ныла-пиаӧс. Талун олӧ Елизавета Александровна ныв дорас. Бура дӧзьӧритӧны, оз элясь, майбыр, ов да выв, гӧгӧр дзим-дзурк. Ас вежӧра, енсыкӧд, кок вылын да и шмонитыштӧ на чолӧмавны локтысь гӧсьтъяскӧд. Сиам Александр Васильевичлы водзӧ на бура овны радейтана матысаяс дорын! Чолӧмавны юбилярӧс волісны Кулӧмдін районса администрация юралысьӧс вежысь Левченко Наталья Анатольевна, ветеранъяслӧн районнӧй сӧветса веськӧдлысьӧс вежысь Зезегова Антонина Амвросиевна, Помӧсдінса администрацияысь веськӧдлысьӧс вежысь Мальцева Татьяна Федоровна, Помӧсдінса ветеранъяслӧн сӧветса председатель Карманова Нина Ивановна, вӧвлӧм удж вывса Помӧсдін сельпоӧн веськӧдлысь Карманова Светлана Алексеевна