9 июль куни сенатор Жон Кеннеди журналистларга Россия ҳукумати “Америка сайловларига бурнини суқишни тўхтатиши” кераклигини таъкидлади.
Кеннеди россияликларни ноябрь ойига белгиланган АҚШ сайловларига яна аралашадиган бўлишса, ҳозирги кунгача жорий қилинган санкциялардан ҳам кучли санкцияларга дучор бўлишлари ҳақида огоҳлантирганини қўшимча қилди.
Кеннеди, шунингдек, русларга Украина ва Қримдан чиқиб кетишни ҳамда уларга ўз келажакларини ўзлари ҳал қилишларига йўл очиб беришни айтганини таъкидлади.
Бундан ташқари, сенатор Москвани Суриядаги “қинғир ишларини” бас қилишга ҳамда Сурия жанубида Эрон ўз позициясини мустаҳкамлашига йўл қўймасликка чорлаган.
Кеннеди олти республикачи сенатор ҳамда Вакиллар палатасининг бир аъзоси билан 30 июндан 4 июлгача Россияга амалий сафар билан борган эди.
22 июнь куни сенаторлар Жон Кеннеди ҳамда Ричард Шелби CNNга берган интервьюларида сафарни АҚШнинг Россиядаги элчиси Жон Ҳанстман уюштирганини айтишди. Ўшанда Кеннеди Путин билан учрашишга умид қилаётганини айтганди, аммо бу амалга ошмади.
Бу орада АҚШ делегацияси ташрифи ҳақида бир-бирига зид хабарлар тарқалди. Ташриф демократлар танқидига учради. Бунга республиклачилар фақат ўзлари боргани ҳамда демократлар назарида, Россияни АҚШ сайловларига аралашуви ва Украина, Сурия ва бошқа ҳудудлардаги фаолияти учун етарлича танқид қилишмагани сабабчи бўлди.
Делегацияга етакчилик қилган сенатор Шелби Россия Думаси раиси Вячеслав Володинга:
- Россияни у ёки бу нарсада айблаш учун келганим йўқ. Айтмоқчи бўлганим, ҳаммамиз яхшироқ алоқалар учун курашишимиз керак, - деганини айтди.
Шелби Россия ташқи ишлар вазири Сергей Лаврога эса:
- Алоқаларимиз танг, аммо АҚШ ва Россия ўртасидаги алоқаларни яхшиласак бўлади, чунки дунё бўйлаб умумий қизиқишларимиз бор ва улар устида ҳамкорликда ишлашимиз мумкин, - деган.
Россия депутати Вячеслав Никонов бўлиб ўтган учрашувларни “умримдаги энг осон учрашувлардан бири” дея таърифдаб, сайловларга аралашиш масаласига фақатгина юзаки тўхталиб ўтилганини айтди.
Аммо Кеннеди журналистларга учрашувларда таранглик сезилганини айтиб, Лавровни “зўравон” дея таърифлади.
- Россияда сиёсий фалсафа йўқ. Бу мафиянинг сиёсий фалсафаси қанақа, деб сўраш билан баробар, - деди сенатор.
- Уларнинг фалсафаси пул ва амалдир. Бу Путин фалсафасидир. У “темир қўл” билан бошқаради. У диктатордир.
Сенатор Россияда эркин матбуот йўқлигини, бойлар ва оддий фуқаролар ўртасида йирик тафовут борлигини қўшимча қилди.
Кеннеди, шунингдек, Россия халқи бундан яхшироқ шароитда яшашга лойиқлигини айтди.
Шундай бўлса-да, Кеннеди Трамп ва Путин яқинда учрашишига қарши эмаслигини, аммо саммит бирор натижага олиб келишига ишонмаслигини билдири.
Икки президент 16 июль куни Хельсинкида илк маротаба саммит ўтказиши кутилмоқда.
- Путинга ишониб бўлмайди. Менимча, тутишимиз мумкин бўлган энг яхши йўл уни жиловлашга ҳаракат қилишдир, - деди сенатор. https://www.instagram.com/ozodlikradiosi/
Присоединяйтесь к ОК, чтобы подписаться на группу и комментировать публикации.
Комментарии 73