Тожикистон 2021 йили Ўзбекистондан 250 миллион куб метр табиий газ импорт қилиш ниятида.

Бу ўтган йилдаги кўрсаткичга нисбатан 11 фоизга кўпдир. Бу ҳақда “Тожиктрансгаз” ОАЖ раҳбарининг ўринбосари Шавкат Шоимов маълум қилган.
“250 миллион куб метр табиий газ етказиб бериш тўғрисидаги шартнома “Тожиктрансгаз” билан “Ўзтрансгаз” ўртасида имзоланди”, дея иқтибос келтиради Ш. Шоимов сўзларидан “Авеста” агентлиги.
Тожикистон 2020 йили Ўзбекистондан табиий газ импортини 40 фоизга ошириб, 225 миллион куб метр газ сотиб олган. Мамлакат шимолига ўзбек газини етказиб бериш тиклангани ҳақида Озодлик аввалроқ хабар қилганди.
Бугунги кунда қўшни мамлакатдан келаётган табиий газдан Тожикистондаги 20 га яқин корхона фойдаланмоқда. Улар орасида Тожикистон алюминий ширкати ва Душанбе ИЭМ-1 каби корхоналар бор.
Ўзбекистон Тожикистонга табиий газ етказиб беришни 2012 йили тўхтатиб қўйганди. Бироқ 2018 йил сентябридан Тошкент қўшни ўлкага газ етказиб беришни тикланган. Шу кунда Тожикистон, расмий маълумотларга кўра, ўзбек газининг ҳар минг куб метрини 130 доллардан сотиб олмоқда.