Россиянинг “Газпром” ширкати 2020 йил бошидан Ўзбекистондан табиий газ сотиб олишни тўхтатди.

Бу ҳақда “Интерфакс” агентлиги энергетика ширкати ҳужжатларига таянган ҳолда хабар қилди.
Ширкат маълумотларига мувофиқ, “Газпром” 2019 йили Ўзбекистондан 7,6 миллиард куб метр (бундан 3,3 миллиард куб метри биринчи ярим йилликда сотиб олинган), 2018 йили 6,7 миллиард куб метр, 2017 йили эса 7,2 миллиард куб метр газ сотиб олган.
Жорий йилнинг биринчи ярим йиллигида “Газпром” Туркманистондан ўтган йилдагидан кўпроқ газ сотиб олган (2020 йил I ярмида - 1,7 млрд куб метр, 2019 йил I ярмида - 1,2 млрд куб метр).
Қозоғистондан сотиб олинаётган газ ҳажми ҳам 5,4 млрд куб метрдан 4,1 млрд куб метрга камайган.
“Газпром”дан газ импорти қисқаришига оид ягона изоҳ шу йил апрель ойида – коронавирус пандемияси важидан чеклов чоралари туфайли жаҳон бозорида табиий газга бўлган талаб кескин тушиб кетгани ортидан берилганди. Ўшанда “Газпром”нинг 512-департаменти бошлиғи Дмитрий Хандога Марказий Осиё мамлакатларидан газ сотиб олишда маневрлар бўлиши мумкинлигини билдирган. Бу пайтда Россия ширкатининг Ўзбекистондан газ сотиб олмай қўйганига 4 ой бўлганди.