Невхы похо’’на ты пэртя’’ тунидо’ тэри ня’’марпидонзь. Ханяхарт падыба нись тара. Тальцюна ила’ саир’’ яӈгаво’’махад падыба пяйдонзь. Ханяӈы’’ тикыдо’ ё’’мыдо’, ӈанид’’ ханяхава’ ханавыдо’. Пудана по’’ туним’ мэ’’ма’ няю’ лаха тохолко, есям’ салдамба тара. Салехардахад хахая ӈэда район’ тер’’, ханеван’ харвана’’ округна’’ еръй хардан’ падродо’ тидхалеванзь турцеты’’. Тандаярка’ Салехардахана туни’ нямна падро тидхалемба ӈэвадавыд’’. Теда’ ненэця’’ тарця серодо’ Новой Уренгойхана, Надымхана тидхале пиръядо’. Шурышкарской, Ямальской районхана мюсерта’’ ненэцяӈга’’на тикада саць хубта. Тэри туним’ мэць тохолковари ни ӈа’’, тикы’ хавна тамна лекара’’мна ядэрць тараӈгу. Тидхалевы падродо’ самляӈг пон’ таславы’’.

Хахаяда яля’ тикы серо’’ няю’ ёльце сава юнм’ намдаваць. Ма’’ним’’, мюсерта’’ ненэцие тунито’ падро тидхалемба, тохолкова’ яхандо’ сехэрэндо’ мирм’, таняна илевамдо’, лекар’’ падродо’ салдамба нядабаӈгудо’. Тедари’ тяхасовна ханяна салдамбавадо’, ханзер’’ сертабавадо’ техэ яхандо’ тамна таславдавэй’’.

Марина Марюй