Харампур’ хардакохона мат’’ классм’ маледамзь. Ириени’ яӈгуво’’махад, нисями хадаени’ ня’ сидни’ ханась. Тарко-Сале’ харад хэваркахана мядодо’ ӈэвыць, ӈамгэ’ пиркана тамини таня’ тохолкованзь хаядамзь, падрони’’ таня’ нивыдаць тэв’’. Матдомдей классм’ ӈани’ яӈорэй’ пэрӈавась, ӈэрё’ няна сибимдей классан’ хаядамзь си’’ив по’’ тохолкудамзь. Нисяни нюдя нянда пухуця яӈгумась. Няхар’’ нюкцямда харта вадабидась, хадаеми нядабидась. Пунахав’ ихиняни таслахая, хой’ няна илеванзь хаидамзь. Нини’’ мань хавнани’ сиддо’ нядавандадо’ яӈгу нисяв’’. Ӈарка ненэця’’ поӈгана вадёдадамзь. Манзаи’’ пяныд теневынась.

ИРИЕНДА ВАДА\

– Ӈыхы похо’’на ненэй ненэця’’ тасу’ хаби’’ ня’ сайнормыць. Мандал’’мана ӈыно мэць ядэрмыць. Ненэй не харбё’’ ӈэвандо’ е’’эмня талебавыдонзь. Ириеми тарем’ ваде’’ӈадась: «Ӈавна няхар’’ мэлван’ ямб пяхад сертавы’’ сядэй пал’’мыць, вэяхана масарпавыдонзь. Ты’ ханӈэ хадабавыць. Тикыто’ сер’ поёдо’ савумдамбавыдонзь». Ханяӈы’’ тарем’ ӈод’’ саюдармыць. Сяхаӈгав’ мякна’’ тасу’ хаби’’ тоць. Нита ӈэвахана мэна Иван Агичев ириехэни мамысь: «Нюнд не нюм’ сяхари’ нюдя хасава нюни’ неӈэ таир’’. Иринана’’ помнандо’ сайнормыць, маня’’ поёна’’ сава’’ ӈэя’’». Мале пон’ выӈгана иледамзь. Ириеми ӈули’’ юнета ненэцянзь, саваривна табекосеты, вадида тидхалёсеты’’. Маня’’ вадамда нива’’ мадабасету’’. Сяны ӈэбта ӈод’’ ӈэвтана’’ мякна’’ тэвыдаць. Тидяни вадида тарцяць: «Ириер ха’’манза, тарем’ ӈэӈгу нив’’». Та’ мальӈгэхэд Агичев’ еркарм’ мэ’’ладамзь.

Автор: Руфина Окотэтто