газета "Няръяна Нгэрм" и "Мынико"

газета "Няръяна Нгэрм" и "Мынико" Ява’’ лэтрамбада нина’’ е’’эмня тодо’ яхат хуркари нядаӈгосэй сертаби’’. Пыдо’ нянандо’ етри’ ӈамгэри’’ тара’’. Мядото’ хэвняна саць тоенана манзаям’ пэрӈа’’. Саляӈгардахана ныланава’ яляха’’на не’’ сэдораванзь ма’’люрцеты’’. Тикахана тамна лыӈгаӈэ мэ’’манда поӈг сяропасеты’’. Небой по’ Некоча Ӈокдэтта «Шьём для СВОих» нюбета пректм’ сертась, тикы манзаямда тамна’ тяха’ минреда. Некоча сяӈок ӈамгэм’ серта’’мамдо’ ваде’’ӈадась: 💬 Маня’’ сэдоранаӈэ ныланава’ яляхана ма’’люрцетыва’’. Поӈг паркормы тохосо’’ пеляха’’на сяропасетына’’. Нядаӈгован’ харвана’’ пили’’ танясеты’’. Ханяӈы’’ тарана ӈавэ тэволасеты’’. Манзаравана’’ ямбан’ ӈока «балаклава»м’ сэдаваць. Ӈэдаравына’’ мэ’’эйдо’. Нянандо’ ӈули’’ таравыць. Тенкана сяд’ талмасавэй савадамдо’ ӈани’ хамыць, носок’’ таранарха’’. Нюлак тохоцяхад сэдаӈгуна’’. Теда’ «Наследие»м’ нюбета библиотекахана мэва’’. Тодо организация’’ тер’’ турӈа’’. Небо’ ӈоб’ ныланава’ яляхана интернет’ мутра’ сер’ тодо яха’’на нядаӈгода’’ Россияна’’ тер’’ ӈамгэм’ сертабавам’ маниеваць. Сэдоранидо’ – сэдораць, панорӈаць, поӈг сяропиць, линюй сертабиць. Яна’’ тер’’ мал’ тарем’ нядаӈгурпато’, сайнорта нина’’ е’’эмня сава няд’’маӈэ тараӈгува’’. #ненэйвада #НяръянаНгэрм #Ямал Автор: Руфина Окотэтто