Ты” дет ӈайта отрасль хомана мансԓама выӈкна диԓина” нешаӈкат ӈа. Александр Илекович Пяк няхаԓдю” шитчет пуӈ «Верхне-Пуровский» совхозхана мансԓаӈа. 2012 похона ӈаԓка ыдянта няампёмы ты” ӈысым няамӈаш, манԓе няхаԓдяӈкня пуӈ бригадир’ӈэ мансԓа. Четаӈ ты” падеԓьш ши’та кайканата” нятапёшту”, хампԓяӈкӈэ совхоз’ 4 бригадахана мансԓаӈа”. Ӈысыханантуӈ ԓэтпёчитуӈ тытоӈ ӈопшеԓы каԓи” тэсамэй” - няхаԓ дёнаԓ ӈок.

Ӈуп дёнаԓкат ва’та” хампԓяӈк дюԓ” тэтоӈ «Верхне-Пуровский» совхозан тонԓюта” ты”. Александр Илекович мансдямта хомана минԓеӈата. Дёԓьше пимшата, чиԓьний нешаӈ. Тэхэна” мансԓанна” неша” мансдятоӈ шеэмӈа. Хыԓаӈ чешчахана”, таӈичохона дячапётахана” тытуӈ ӈысым писамэй веԓаштутуӈ. Ненымана таӈичохона недяӈк маԓьшахана, пинԓюдю” дёԓьшкана тытоӈ тэтнашту”. Мансдянта нямна дёԓимяшо Александр маньшту: «Таӈичохона недяӈк”, пинԓю”, аппы” ты” каноньшту”.

Дячапётахана тэӈи” топаӈ кавшаӈкана канаԓьштут. Ԓакхай по”хот халаку” - тыӈ канунта” ӈокма”. Чикиӈ камна по”тахана ты” шехе” вомтӈа”, четаӈ выӈкна кадюта” хома дя” дику”. Выйӈ, петаԓа чупей паԓасуй, ты” шехеэ” чупей танмы”». Пясамы дяхана тэӈи” падиԓана ни’ӈа”. Четаӈ дяԓи” тахана” ԓэтпётахантуӈ ӈука тэтоӈ ниш’ту” дёхо”, по” тахана тытуӈ ӈысы хома патаԓт камашту. Александр Пяк ватамта няампёта, вивӈутута бригадир’. Куԓкаԓи” выӈкай мансди” шеԓтапёш тамна нючаӈэ тохомай. Ӈамыԓим шеԓтапёш чепьпананта дёԓьше меԓь нешаӈ, куԓкаԓи ӈайватам пяпнанта ниш’тута дя’ам. Мята тум чудипё, выӈкай дилмта, мансдямта минԓе ши’та пушадюм Тамара Валерьевна нятапёшту. Тамара дёԓьше чиԓьний ни, меԓь, хайтуԓамам чедимяӈа.

Александр Илекович, Тамара Валерьевна хома шоньшахана, ӈуп вив мэш шичадю” ӈуп пуӈ манԓе ӈокна диԓиӈахаӈ. Пы’чи кашем’дю” хома нюч”. Нич” шаӈкмян выӈкай мансдян тохоԓамэч’, таԓям четаӈ куԓкаԓи ӈайватам шеԓтамам чедимяӈа”. Каса нюхудёч’ манԓе мансдяӈ дет тохоԓкухуӈ. Александр Пяк куптаӈ хомана тэхэна” мансԓаманта де’эмня веԓву” мимы” куԓкаԓи” почётный’ грамота”, шанат благодарственный’ патԓота” тадяӈа”.

Чикиӈ камна Александр Илекович званихидёта «Ветеран ЯНАО», «Заслуженный оленевод Ямала» тадя. Сельский’ хозяйстваӈ дет тонԓюта предприятихина” ӈука неша” мансԓаӈа”. Пы’тоӈ каԓьтуӈ нэхэханатуӈ комытуӈ ӈамԓыхинатоӈ: ты ӈамсахана, каԓяхана, ӈочахана шаӈкмян тэмс нешади” ӈамԓымпи”. Чикиӈ камна ты” падиԓта”, каԓитана” неша” - выӈкай дилм ԓэтпёта”. Таԓям сельский’ хозяйстваӈ дет ӈайта дяԓяхана няӈтуӈ маман ха’ӈама”: хомана диԓиӈата”, нинюта канэԓьшту”, мансдяԓа нидя шеэм.