Маня’’ яхадана’’ таня’ сидя нява’’ хаяханзь. Пыди’ сидябты харти’ тэнзади’ нерня’ минренаха’. Галина Косыгина (Ядне) Саляӈгардахана иле, округна’’ тодо’’ тэнз’’ ненэцие’’ Ассамблея’ ӈэвахана мэнаӈэ тара. Иван Сандрин Мужи харад’ няд ядэрӈа, райондо’ серо тасламбада, ня’’амбада хардахана манзара. Ялэхэ’’ пэрта’’ манзаити’ хавна ӈамгэри ӈамгэхэна янди’ тер нядабасетыхы’, луца’ вадавна хэта общественной манзаям’ минресетыхы’. Нямэхэна хаби’’ я’ нямна ӈэдалёрӈахась. Тамальӈгана няхар’’ ю’’ тохолкодась, тикы’’ поӈгад сидди’ тамна’ тяха’ хана таславыць.

Теда’ яна’’ ӈарка хардахана ӈэда ӈани ё’’ поӈгы серк’’ ненэцие тохоламбада институтхана, МГИМО’ няна ма’’люрӈа’’. Сиддо’ тикы тохолкулава’ яхана манзарана’’, тамна ӈани’’ серо теневана’’ хибяри’’ тохоламби’’. Е’’эмняндо’ хуркари тохолкови хамэдавы’’. Ненадовна пуна пыдо’ минаць лахана, падро ервха’’ падыба, илам’ савумдамбада проект падыба, илма’’ мэйрамбада вату нерня’ пэраць, тикахад ервха’’ вадам’ тэврамба теневабто’ тара. Ӈадьбята Россияна’’ сямянхат тю’’уня’ мэна ерво, харто’ индо’ сер’ манзарани, тодо’’ тэнз’’ ненэцие’’ организация ня’’амбади, ООН’ тер, вату тасламбади, падыбади лаханако нята’’.

Малевандо’ сер’ сямянхат ва’’лёймдо’ тэраӈгу’’, нянда миллион есям’ мита’’. Пыда магистратуран’ хэсь пиртада, MBӇ программан’ пыхыдамда падбата ӈод’’. Сита хавна юкад вата тетамдо’ ненадумдаӈгу’’, хуркари’’ ёльцяндо’ тянё тохолковаха’’на, Россия’ няби ӈани’’ ё’’ тиӈгывна минда серка’’на мэсь пиртадо’.

Автор: Анна Яптик