ՓԱՌԱՎՈՐ ՈՒՂԻ

Ամենափոքր երկիրն անգամ պետք է ունենա իր բանակը: Միայն բանակի գոյությունն է ուժ ծնում, ստեղծում երկիրն անսասան պահելու հնարավորություն:
Մեր ասքանազյան բանակը դարերի խորքից եկած պատմություն ունի, որն ուսումնասիրելիս հասկանում ենք, որ այն նվիրյալ, մարտական ոգով դաստիարակված ու անկոտրուն կամքով օժտված ռազմիկներից է ձևավորված: Սա է մեր հաղթանակների ու ամրության գրավականը:
Այս տարի լրացավ շրջանի տարածքում տեղակայված N զորամասի կազմավորման 25-ամյակը: Զորամաս, որը կազմավորվեց նորաթուխ երկրի համար բախտորոշ ժամանակաշրջանում և իր արժանի ներդրումն ունեցավ մեր երկրի պաշտպանության և կայացման գործում, զորամաս, որ իսկական արծվաբույն է ու իր ողջ պատմության ընթացքում կռեց բազում հաղթանակներ, դարձավ ամուր վահան թշնամու բոլոր ոտնձգությունների դեմ, բնակչության համար` հույսի ու հավատի մարմնացում: Այս զորամասն իր 25 տարիների ընթացքում ունեցել է հմուտ, բարձր կարողություններով ու գիտելիքների պատշաճ մակարդակով օժտված հրամանատարներ, սպաներ, մարտունակ ու մեծ կամքի տեր զինվորներ: Զորամասն անցել է փառավոր ուղի:
Զորամասի կազմավորմանը նվիրված տոնական միջոցառումը տեղի ունեցավ հուլիսի 1-ին: Միջոցառմանը ներկա էին ՊԲ հրամանատար գեներալ-լեյտենանտ Լ.Մնացականյանը, շրջվարչակազմի ղեկավար Կ.Թովմասյանը, Հայ Առաքելական եկեղեցու Արցախի թեմի փոխառաջնորդ տեր Սահակ վարդապետ Շաքարյանը, դիվիզիայի հրամանատար գնդապետ Ջ.Հարութունյանը, զորամասի նախկին հրամանատարներ, նաև` զորամասի հիմնադիրներ, մարդիկ, ովքեր այժմ զինվորական թոշակառուներ ենª Ա.Գրիգորյանը, Ա.Խաչատրյանը, Է.Աղաբեկյանը, Լ.Աղաբեկյանը, Կ.Ալավերդյանը, Վ.Գրիգորյանը, Վ.Մովսիսյանը և ուրիշներ:
Առավոտյան, ժամը 9-ին, զորամասի անձնակազմն արդեն շարված էր շարահրապարակում: Զինվորական նվագախումբը կատարում էր զինվորական մարշեր և ազգային մեղեդիներ: Զորամասի հրամանատար գնդապետ Գ.Գաբրիելյանը ողջունեց և շնորհավորանքի խոսքը հղեց բոլոր ներկաներին ու զորամասի անձնակազմին: Իրենց շնորհավորանքի խոսքերով հանդես եկան ՊԲ հրամանատար գեներալ-լեյտենանտ Լ.Մնացականյանը, Հայ Առաքելական եկեղեցու Արցախի թեմի փոխառաջնորդ տեր Սահակ վարդապետ Շաքարյանը, Սոս համայնքի ղեկավար, ազատամարտիկ Հ.Գրիգորյանը, գնդապետ Վ.Իշխանյանը: Շքանշաններ, շնորհակալագրեր, պատվոգրեր, նվերներ հանձնվեցին զորամասի սպաներին, զինվորներին և ազատամերտիկներին: Տոնական այդ օրն ասված յուրաքանչյուր խոսք համեմված էր հպարտության և հավատի արտահայտությամբ, յուրաքանչյուր ելույթ ունեցող համոզված էր, որ երկրի հանգիստն ապահովողն ու ապագայի երաշխիքը եղել ու մնում է հայրենիքի պաշտպանը, ուստի բարեմաղթանքի բազում խոսքերի հասցեատերերը հայ զինվորն ու հրամանատարն էին: Պատմությունը միշտ նրանց շնորհիվ կհարատևի, ապագան հենց նրանց հայրենասիրության, նվիրումի շնորհիվ կկերտվի:
Բարձրաստիճան հյուրերը և զորամասի հրամանատարությունը ծաղկեպսակ և ծաղիկներ դրեցին զորամասում տեղադրված հուշակոթողին, մեկ րոպե լռությամբ հարգելով բոլոր սուրբ նահատակների հավերժ կենդանի հիշատակը:
Իր հետաքրքիր և ոգեշնչող վարժանքով հանդես եկան հետախուզական վաշտի զինվորները, որին հաջորդեց զինվորական հանդիսավոր երթը:
Հայոց բանակն այսօր ոչ միայն հուսալիորեն պաշտպանում է մեր երկրի պետական սահմանն ու անկախությունը, այլև մասնակցում միջազգային խաղաղապահ գործընթացներին, նոր մարտահրավերներ ընդունում և արժանապատվորեն դիմակայում դրանց:
Այսուհանդերձ մեզանից յուրաքանչյուրը, գիտակցելով այս ամենի կարևորությունը, պետք է պատրաստ լինի իր ներդրումն ունենալ Հայոց բանակի բարգավաճման գործում:
ՙՎաղը հաղթելու է նա, ով մինչև այդ վաղն իր հոգու մեջ կտանի հաղթանակը՚,- ասում է մեծն Նժդեհը:
Փառք ու պատիվ ապագա կերտող մարտիկներին:
Արփի ՂՈՒԿԱՍՅԱՆ
Ճարտարի հ.5 դպրոցի
11-րդ դասարանի աշակերտուհի