Ӈэрм’ ямдо’ хынобтамби’’

Хо’’ Саляхана Антонида Сметанина иле. Пэ’’ хоё’’ тер’’ тикы нямдо’ мал’ теневадо’. Неноховавна сёётэй’’ ненэцие’’ поӈгана юнда пили’’ сосеты. Ӈока по’’ ямбан’ ненэцие’’ культурам’ нерня’ минре, иландо’ мэсыдм’ тохоламби, невхы’’ сё ма’’ламби.
Ирината ила’ саирм’ лэтрамбавам’ манзаяданда мэ’’ӈада. Сёётэй’’ ӈацекы тидхалембадаӈэ тара. «Нумгыкоця» нюбета ансамбльхана сё мэць тохоламбида. Пыдо’ ӈарка няхадандо’ невхы’’ лаханако, иле’’ми намдорӈа’’. Тикыдо’ няд’’мяць ненэй вадамдо’ тохоламби’’, выӈгы илма’’ торомдамби’’.
«Ялэмд» няби «Овс мув нэ» фольклорной ансамбльха’ тер ӈани’ пыда ӈобт’ ма’’лавыда. Няхар’’ ю’’ по’’ ямбан’ нермбэртядандо’ тара. Тикы’ хавна «Помни свои истоки» нюбета клуб’ ӈэвахана мэ.
☝🏻Пелямда газетахана толара’’🤗.
Харта ӈэрм’ тер, ненэй не. Нюдя ӈэванда мальӈгана мята тер’’ Лаборовой’ хардакохона илевы’’. Мяканандо’ выӈгад ха’’морта ты пэртя’’ нултаӈгавы’’. Тарця мядонди нёлёко Антонида ӈули’’ ӈатевыда. Нядандо’ едэй лаханако, сё намдасеты. Ӈадьбята тев’ ёльцянд’ вы’ тер нида манэць пили’’ маймбасеты.
Илебей некоцяӈэ Саляӈгардахана тохолковы. Тикы’ пуд тамна’ тяха’ Санкт-Петербург март’ манзаянда нямна теневабцуда ӈокамдаванзь тохолкованзь хэвы. Иланда ямбан’ Аксаркахана манзара. Вадавнанда, сяхаӈгарт’ несэй яхана илеван’ нивы харва’’: «Ӈарка марка’’на пэдакабты. Маня’’ хардакохонана’’ ими таӈгасеты. Хусувэй ненэць’ си’’ми тенева, мань сиддо’ ӈани’ нюсавэй’’ теневадм’. Ӈэрм’ яхадани сава ям’ ховами яӈгу».
Нюта ню’’ хадамдо’ «ӈарка небя»ӈэ нюмдебидо’. Пыда сиддо’ хусувэй ӈамгэн’ тохоламби. Ненадовна харта нисяданда намдавы табекомда мал’ теневадо’: «Хэвхананд мэна нямд няда пирпат, нядад’’. Е’’эмнанда ӈамгэхэртм’ нён сяй’’».
«Хынопата сёкоцяда япда мерцякоцяраха. Ӈули’’ сомбой. Инзелевари’ то’’олха. Харта теневабцуда ӈацекэхэ’’, илебей ненэцяӈг’’ тэволэйда. Пирувнанда ненэй ненэцие’’ ила’ саирм’ теневана ненэць’ тянё», – тарем’ Антонида Ивановна’ нямна манзара нида лахана’’.
Тандаярка Хо’’ Саля’ тер’’ сёётэй’’ нито’ нямна ёльце сава юнм’ намдавы’’. Антонида Ивановна тидхалембада проектанда няю’ грант’ еси ня’’амвы. «Легенда о стихиях тундры» нюбета спектакльм’ ӈарка Президентской фонд’ пирдырман’ ӈэдабтамбавэда. Таняна 1500 манзаи’’ поӈгад лаханакомдо’ ӈули’’ саву’’мэдо’, Недво’’мы есядо’ тэмдорць мэтыдо’. «Нумгыкоця» няби «Ялэмд» ансамбльхана мэна’’ едэй панэдамдо’, имбытадамдо’ сэда пирта’’.
Тарця тарана серм’ минрена’’ нина’’ манзаидо’ етри’ тид’’ миӈая’’, юндо’ яна’’ тиӈгывна пили’’ соя’’.
✍️ Галина Окотэтто’ падвы
📸 Марина Яр, Антонида Сметанина’ ӈэдабтавы